Paraditen e sotme, është grabitur posta sekrete e prokurorisë së Durrësit.
Dy persona të armatosur dhe ende të paidentifikuar kanë kryer grabitjen, duke i marrë disa dokumente postierit, në një rrugicë pranë institucionit të akuzës.
Në praktikën zyrtare në prokuroritë e rretheve, posta sekrete përmban dy lloj dokumentesh. Përgjithësisht materialet sekrete prokurorive të rretheve i shkojnë me postë ose nga SHISH, ose transkripte të përgjimeve që sjell Prokuroria e Përgjithshme. Nuk dihet se cfarë konkretisht kishte në cantën e postierit këtë të martë.
“Rreth orës 10:30- 11:00, në lagjen Nr.11, në afërsi të Postës në Durrës, shtetasi I.K., me punë korrier pranë Prokurorisë së Rrethit Gjyqësor Durrës është sulmuar nga dy persona të paidentifikuar , të cilët i kanë marrë disa materiale që i kishte tërhequr nga Posta.
Nga ana jonë po punohet intensivisht dhe po kryhen të gjitha veprimet e duhura hetimore në bashkëpunim me Prokurorinë e Rrethit Gjyqësor Durrës me qëllim identifikimin e autorëve, kapjen e tyre dhe zbardhjen e plotë të rrethanave të ngjarjes”, njoftoi Policia e Durrësit.
