Një aksident i rëndë ka ndodhur të dielën në autostradën AK në afërsi të lokalitetit Humlikon në Zvicër, ku për pasojë ka humbur jetën një 42-vjeçar shqiptar, Ndërkohë që pesë të tjerë kanë pësuar lëndime, disa prej të cilëve të rënda, shkruan 20minuten.ch.
Viktima është një shqiptar nga Komuna e Deçanit, ndërsa në këtë aksident kanë mbetur të plagosur bashkëshortja e tij dhe vajza.
Sipas të dhënave të para me të cilat ka dalë Policia Kantonale e Cyrihut, në një vendndalim në autostradë, nga shkaqe ende të panjohura, ka ndodhur përplasja e fuqishme e disa automjeteve. Nga nëntë persona që kanë qenë në atë moment në makinat e përfshira në aksident, ka humbur jetën shoferi i njërës nga makinat.
Pjesa e autostradës në mes të lokaliteteve Henggart dhe Adlikon është bllokuara nga të dyja anët, ndërsa është liruar vetëm pas orës 21:30, transmeton albinfo.ch.
Për shpëtimin e personave të përfshirë në këtë aksident të rëndë, janë mobilizuar, veç autoambulancave, edhe një helikopter i Rega-s dhe një i Ndihmës Ajrore nga Gjermania, të cilët kanë bartur të pësuarit në spitale.
