Skënderbeu “shkundet” menjëherë pas humbjes në Laç, që pasoi me deklaratën befasuese të trajnerit Ilir Daja. Pavarësisht se kampionati nuk është vënë në diskutim, humbja, për nga mënyra e reagimit të ekipit në fushë, ishte tepër e rëndë. Për këtë arsye, por mbi të gjitha edhe për të qetësuar situatën brenda ekipit, është zhvilluar dje një mbledhje urgjente në rezidencën e skuadrës në Durrës, ku veç trajnerit dhe stafit ka qenë i pranishëm edhe presidenti Ardjan Takaj.
Si rrallëherë, Takaj dje nuk i ka kursyer tonet e larta pas asaj paraqitjeje në Laç. Numri një i klubit bardhekuq ka kërkuar llogari deri në një për të gjithë lojtarët, sidomos për titullarët. Presidenti ka shkuar më tej, ku e ka cilësuar si të paprekshëm trajnerin e Skënderbeut, Ilir Daja, madje ka refuzuar çdo lloj dorëheqjeje nga ana e teknikut, duke i dhënë besim të plotë, shkruan PanoramaSport.
“Një lojë të tillë nuk e kisha menduar se do ta shihja nga ana juaj. Është e papranueshme ajo që pashë në pjesën e dytë. Se kuptoj se çfarë pati ekipi në këtë ndeshje në pjesën e dytë, nuk e di çfarë ju shkon në mendje? Jemi në një pozicion të vështirë, e di për shkak të dënimit të UEFA-s, por unë iu siguroj se do të vëmë të drejtën në vend. Do më thoni që ndikoi dënimi i një dite më parë, nuk është justifikim.
Kjo sepse e dinim që do të ishte kështu dhe ishim të përgatitur. Tani më shpjegoni ju çfarë ndodhi? Është mëkat për ne që bëjmë një lojë të tillë, sidomos për ju veteranët e ekipit, ju lojtarët më me eksperiencë. Nuk braktiset trajneri te Skënderbeu, sepse pas meje është ai dhe këtu mbyllet çdo diskutim.
Dua të bëni kthesën, jo me pikë, sepse nuk mjafton. Dua të shikoj ekip të konsoliduar në fushë në ndeshjet e radhës. Tani dua me çdo kusht Kupën, u kuptuam”, mbylli i nxehur diskutimin para ekipit presidenti Ardjan Takaj. Më pas, gjithçka ka vijuar e qetë me diskutime brenda grupit, teksa të gjithë kanë marrë vendimin që do të reagojnë duke filluar nga ndeshja e radhës.
Kjo ishte hera e parë që Takaj ka ngritur tonet me ekipin këtë sezon, ndërsa tani “topi” mbetet në anën e lojtarëve, që të japin përgjigjen e tyre nga fusha. Nga ana tjetër, për sa i përket të ardhmes së trajnerit, numri një i klubit ka vendosur pikat mbi “i” duke ua bërë të gjithëve të qartë, se trajneri i Skënderbeut është dhe do të jetë Ilir Daja dhe për këtë nuk ka asnjë diskutim.
