Shoqata e Transportit Kombëtar Interurban i ka kërkuar ministrit të Transportit, Damian Gjiknuri, të tërhiqet nga vendimi për liçensimin në mënyrë të njëanshme të 43 linjave interurbane. Kujtim mema, kryetar i kësaj shoqate, tha se Ministria nuk mund të miratojë liçensat në mënyrë të njëanshme pa u konsultuar më parë me ne.
“Linjat e reja duhet të miratohen në bashkëpunim me shoqatën, duke rënë dakord nëse janë të nevojshme apo jo”, tha ai.
Shoqata shprehu shqetësimin edhe për mungesën e terminaleve të autobusëve, duke kritikuar krerët e bashkive të cilët nuk kanë asnjë projekt në këtë drejtim.
Ndërkaq, për të disatën herë u ngrit shqetësimi i transportit të paligjshëm, i cili sipas Memës dëmton konkurrencën e ndershme.
Sipas tij, janë 250 automjete që ofrojnë shërbim të palicencuar, ndërkohë që institucionet nuk marrin asnjë masë penalizuese kundrejt tyre.
