Nga Boldnews.al
Saimir Tahiri, ish-ministri i Brendshëm deklaroi dorëheqjen si deputet gjatë një konference për median, ku lëshoi kritika të shumta ndaj qeverisë që ka përfaqësuar, opozitës, presidentit dhe ambasadorëve kryesorë në Tiranëë.
Ai justifikoi punën e tij në krye të Ministrisë së Brendshme, duke sulmuar hapur dhe pa asnjë kompleks pasardhësin e tij, Fatmir Xhafaj. Tahiri u shpreh se “ministri i Brendshëm po flet për kanabizimin e Shqipërisë më keq se sa flet Saliu dhe Luli”.
Gjithashtu, ai përmendi disa shifra ku, sipas tij, në 4 vitet kur ka qenë Ministër i Brendshëm, është mbjellë në total më pak hashash se sa në një vit të qeverisjes së Sali Berishës. Por, “këtë nuk e përmend ministri i Brendshëm i qeverisë socialiste. Nuk e përmend as kryeministri këtë krahasim”, u shpreh Tahiri.
Sipas tij, “ministri i brendshëm rri e numëron bandat kriminale në televizor, për turp”. Asnjë vend i zhvilluar nuk e bën këtë, sipas Tahirit, pasi “nëse do të jetë gjendja në Shqipëri kështu, atëherë të gjithë duhet të marrim malet”.
Në konferencë për median, Tahiri kritikoi edhe ligjin për Vetingun në Policinë e Shtetit, i ideuar dhe prezantuar në Parlament nga pasardhësi i tij, Fatmir Xhafaj. “Ligji për vetingun në polici i ka bërë policët e thjeshtë që të mos kenë asnjë besim dhe të jenë të frikësuar. Janë këta policë që për shumë vite janë përballur me krimin dhe që po ashtu kanë përballur edhe baltën që ka hedhur politika mbi ta”, u shpreh Tahiri.
