Nga Boldnews.al
Në daljen e fundit publike si deputet, Saimir Tahiri ka dëshmuar sinqeritet shumë të lartë, lidhur edhe me rolin e ambasadorëve të rëndësishëm të akredituar në Tiranë.
Është fare e qartë se cilëve u referohej ish-ministri i Brendshëm-ambasadorit amerikan në Tiranë, Donald Lu dhe ambasadores së Bashkimit Europian, Romana Vlahutin.
Saimir Tahiri kujtoi ditën kur Parlamenti Shqiptare votoi me unanimitet ligjin për Vetingun e gjyqtarëve dhe prokurorëve. “Votuam 140 deputetë si dele dhe, për turp, të paktën nga këndvështrimi im, mbi kokën tonë duartrokisnin dy ambasadorë”. Në mesnatën e 21 Korrikut 2016, parlamenti votoi ndryshimet kushtetuese që i hapën rrugën Reformës në Drejtësi. Një pamje domethënëse e atij votimi ishte përqafimi i ngrohtë i çiftit të ambasadorëve Lu-Vlahutin.
Por Tahiri duket se ka hatërmbetje shumë më të mëdha me ambasadorët, sidomos me atë amerikan, Donald Lu. “Ka ambasadorë këtu që bëjnë prokurorin dhe gjykatësin. Ka diplomatë që shiten e blihen sipas interesave lokale…” përmendi ndër të tjera ish-ministri i Brendshëm.
Në daljet publike gjatë muajve të fundit, ambasadori amerikan Donald Lu e ka përmendur shpesh emrin e Saimir Tahirit, si një person nën hetim dhe që duhet gjykuar. Për këtë arsye, në këndvështrimin e ish-ministrit të brendshëm, shprehja “këta ambasadorë që bëhen prokuror e gjyqtar” i referohet më së shumti diplomatit Donald Lu.
