Ka kaluar kohë, por me siguri shumë e kujtojnë ish-kryetarin e Bashkisë së Tiranës Edi Rama, sot kryeministër, ndërsa fliste me megafon në Komisionin Hetimor Parlamentar të ngritur, i cili do të hetonte mbi shpenzimet e fondeve të bashkisë. Beeeee, beeeee…, përsëriste Rama shpesh, duke bërë që ky komision i drejtuar nga Sokol Olldashi thuajse të dështonte. Por nuk është i vetmi, pasi të tjera komisione, sa serioze në dukje, aq edhe qesharake si objekt hetimi, të cilët kanë prodhuar as më shumë e as më pak sesa një hiçgjë.
Ajo që mbetet është vetëm kosto edhe finaciare, pasi çdo anëtar i komisioneve parlamentare, për çdo mbledhje të zhvilluar, merr 2000 lekë, ndërsa kryetari 2500. Këto komisione kanë të garantuar debatin politik, shpeshherë me përplasje, batuta apo fjalime qesharake që jo rrallëherë tregon edhe nivelin e disa deputetëve. Komisioni i parë parmelantar në periudhën postkomuniste u ngrit në vitin 1991, që hetoi ngjarjen e 2 prillit 1990 në Shkodër, ku u vranë në protesta katër qytetarë.
Për të parë seriozitetin dhe ndarjen e madhe mes politikës mjafton që të shihen konklusionet e të gjithë komisioneve hetimore parlamentare. Asnjë komision i ngritur për çështje të caktuara nuk ka dalë me një raport të vetëm. Zakonisht kanë përfunduar me dy raporte, një të mazhorancës dhe një tjetër të opozitës, ose ka pasur edhe komisione të tjera parlamentare ku opozita i ka braktisur, duke mos marrë pjesë në asnjë diskutim.
Nisur nga objekti i hetimit, disa komisione ngjanin se ishin seriozë, duke përmendur ngjarjet e vitit 1997, korruspsionin i pretenduar për rrugën Durrës-Kukës, ngjarja e 21 janarit 2011, ku gjatë protestës para kryeministrisë u vranë katër qytetarë, shkarkimet dhe emerimet në policinë e shtetit për periudhën 2013-2014, apo edhe komisioni hetimor për privatizimin e OSHE-së. Ndonëse këto raporte përfundimtare nuk vlejtën thuajse për asgjë, çështja që trajtuan ishte e rëndësishe. Ndërsa ka edhe komisione hetimore më shumë se qesharake, siç ishte rasti “shkuljes së veshit” të djalit të Neritan Cekës, nga ana e ish-liderit të opozitës në atë kohë Edi Rama. Rama u akuzua se gjatë vizitës që kishte pasur në Vjenë ishte konfliktuar me Ergin Cekën, djalin e Neritan Cekës, në atë kohë ambasadori ynë në Itali dhe në “konflikt” e sipër Rama dyshohet se e kapi nga veshi….
Komisionet hetimore 2014-2018
- Komisioni hetimor “Për të kontrolluar zbatimin e legjislacionit në fuqi gjatë procesit të lëvizjeve të burimeve njerëzore të Policisë së Shtetit”.
- Komisioni hetimor “Për hetimin dhe zbardhjen e plotë të të gjitha fakteve dhe rrethanave, lidhur me akuzat e bëra publike për implikim të Forcave të Armatosura dhe bazave të saj ushtarake në veprimtari të kundërligjshme në transportin e lëndëve narkotike”.
- Komisioni hetimor “Për shqyrtimin e kërkesës së një grupi deputetësh për shkarkimin e anëtarëve të Këshillit të Lartë të Drejtësisë, të zgjedhur nga Kuvendi, Elvis Çefa dhe Lulzim Lelçaj, për shkelje të rëndë të ligjit”.
- Komisioni hetimor parlamentar “ “Për verifikimin e ligjshmërisë së emërimeve në detyrë, të realizuara gjatë periudhës 15 shtator 2013 – 31 maj 2014 në administratën shtetërore, entet publike apo shoqëritë tregtare shtetërore”.
- Komisioni hetimor “Për të kontrolluar zbatimin e legjislacionit në fuqi për administrimin e bazave të të dhënave shtetërore tatimore, si dhe për të njohur dhe verifikuar më thellë fenomenin e ndërhyrjes dhe të bllokimit për disa ditë të sistemeve elektronike tatimore” .
- Komision hetimor për privatizimin e OSHE-së dhe aferat e dyshuara për kalimin e saj te kompania CEZ. Në pyetje disa herë u mor edhe Shkëlzen Berisha, djali i ish-kryeministrit Sali Berisha.
- Komisioni hetimor për çështjen “Tahiri” ku do të hetohet e diskutohet mbi veripmtarinë e ish-ministrit Saimir Tahiri dhe problem i kultivimit dhe trafikimit të lëndëve narkotike.
