Nga Boldnews.al
Në kulmin e debatave nëse Shqipëria e meriton ose jo hapjen e negociatave me BE-në, si vend kandidat, lajmet që vijnë nga Spanja dhe Italia, të dyja në të njëjtën ditë, nuk janë aspak të mira. Në Spanjë u shkatërrua një organizatë kriminale me drejtues dy shqiptarë të cilët u kapën me 1 ton kokainë. Po dje, Guardia di Finaza bllokoi në Adriatik një sasi të madhe kanabisi prej dy tonësh dhe arrestoi dy të rinj shqiptarë. Këto ishin dy “spisode të vogla” që tregojnë se krimi i organizuar në Shqipëri është në nivele të larta, pasojat e së cilës po i vuajnë vende të Bashkimit Europian. Kryeministri shqiptarë Edi Rama e ka një përgjigje për këtë fenomen, por janë fjalë që BE nuk do të donte t’i dëgjonte kurrë. “Kemi bërë përparime të mëdha në luftën kundër drogës dhe krimit të organizuar në përgjithësi. Kemi një plan kombëtar për zhdukjen e fenomenit të kanabisit në Shqipëri”- deklaron Rama.
Kancelarja gjermane Angela Merkel mëse e informuar mbi situatën në Shqipëri në takimin që pati me kryeministrin Rama në Berlin kërkoi që të bëhet më shumë në luftën kundër krimit të organizuar dhe korrupsionit dhe për këtë çështje nevojiten fakte konkrete. Tashmë Shqipëria nuk është më vetëm një vend i prodhimit dhe trafikimit të kanabisit, pasi grupet shqiptare janë fuqizuar dhe po kontrollojnë një pjesë të konsiderueshme edhe të trafikut të kokainës dhe heroinës. Për këtë fenomen shqetësim kanë ngritur vende si Anglia, Italia, Holanda, Spanja dhe Greqia. Vlen vetëm për statistikë si sasi, por asesi si hetim i mirëfilltë, bllokimi i 623 koligram kokainë në Maminas të Durrësit dy muaj më parë. Në pranga janë vetëm shoferi i kamionit ku u gjet kontenieri me drogë dhe administrator i kompanisë. Pronari i saj ndodhet në arrati, ndoshta i informuar më parë se policia kishte rënë në gjurmët e drogës dhe nga dita në ditë pritej vetëm ndërhyrja për të kapur lëndën narkotike.
Ndonëse situata e krimit të organizuar, veçanarisht trafikut të drogës është mjaft problematike, qeveria kërkon hapjen e negociatave të Shqipërisë me BE-në, duke këmbëngulur se e meritojmë të marrin statusin, që në muajin qershor të këtij viti. Për aq kohë sa fenomeni i trafikut të lëndëve narkotike do të vijojë dhe grupet kriminale të veprojnë lirshëm në Shqipëri hapja e negociatave duket gjithnjë e më larg. Tre vendet skeptike për përparimin e vendit tonë mbesin Gjermania, Franca dhe Holanda. Përveç krimit të organizuar ata po përballen edhe me fluksin e madh të azikërkuesve shqiptarë, të cilët largohen kryesisht për shkak të problemeve ekonomike, papunësisë dhe mungesës së shpresës. Nëse do ishte “kriter” sasia e madhe e drogës që prodhohet e trafikohet nga Shqipëria, qeveria jonë do e “meritonte” hapjen e negociatave
