Në përgjigje të kryeministrit Edi Rama, për të thënë në sy të vërtetat dhe për akuzën e bërë se biznesi gënjen, pasi nuk e ka me TVSH por me tavanin, ka reaguar përfaqësuesi i shoqatës së biznesit.
Ai ka folur copë, duke e kritikuar Ramën, e duke deklaruar se aktualisht ka një klimë armiqësore ndaj biznesit.
Kreu i Shoqatës së Biznesit të Vogël, Albert Nasto, i ka thënë Ramës të gjitha problemet e biznesit të vogël dhe i tha se janë shtuar taksat dhe klima është shume e keqe për të bërë biznes.
“Sa për çështjen e të gënjyerit kemi qenë bashkë kur bëmë luftën ndaj informalitetit. Grupet që punojnë poshtë me bazën janë bërë ç’të të them, aty kasa fiskale ka një veprim që thotë ju lutem prisni, ne gjobitemi se na thonë, kujt i thua ti ju lutem prisni, kjo është çmenduri, ai është vetë procesi. Na thonë që nuk janë aq burra sa nuk i thonë në sy, nuk kam asnjë problem, ju kritikoj se bashkëbisedimi nuk është i keq, nuk kam ardhur ti zë vendin ndonjë deputeti, ne do vdesim biznese, nuk pretendojmë ti zënë vendin dikujt. Po flas për taksat, nuk duam rritje, tarifat e vendorëve janë të larta. Kasat, çmimi është shumë i lartë, servisi e mirëmbajtja janë jashtëzakonisht të lartë për një biznes të vogël, ju lutem shumë, duam të ulen tarifat nëpër bashki, taksat”- tha Nasto.
