Tek Arsenali kanë nisur nga puna për të gjetur pasardhësin e Arsen Wenger-it. Francezi po mbyll kështu një epokë 22 vjeçare dhe tani drejtuesit e klubit të mësuar me trajnerë afatgjatë do të duhet që të gjejnë një njeri që t’u rikthejë sukseset dhe të shmangë një periudhë tranzicioni të gjatë.
Sipas tabloidit anglez “The Sun”, njeriu favorit për t’u ulur në stolin e “topçinjve” është Luis Enrique. Ish trajneri i Barcelonës ka nisur kontaktet me drejtuesit e klubit, madje u ka vendosur atyre edhe një kusht për të marrë detyrën e re.
Spanjolli kërkon që të shpenzohen 200 milionë sterlina për përforcime. Ai i ka idetë e qarta tek Arsenali. Vetëm sulmi nuk do të ndryshojë, ndërkohë që porta, mbrojtja dhe mesfusha do t’i nënshtrohen një ndërhyrjeje.
Kështu për dy shqiptarët Shkodran Mustafi dhe Granit Xhaka vendi nuk është më i sigurt te londinezët.
Të paprekshmit duket se janë blerja rekord prej 60 milionë sterlinash Pierre-Emerick Aubameyang dhe Alexandre Lacazette. Radja Naingolan është një futbollist që Luis Enrique e pëlqen shumë dhe e do në skuadër.
Politika e tij e blerjeve ndryshon nga ajo e francezit, i cili përgjithësisht ka afruar lojtarë të rinj në moshë si investim për të ardhmen. Kurse mesfushori belg është 29 vjeç.
Por fakt është sipas medias angleze se cilido trajner që do të zërë vendin e Wenger-it do të ketë më pak ndikim në bërjen e merkatos, duke qenë se kjo detyrë do të transferohet në rangjet më lart.
Ish drejtori i Barçës Raul Sanllehi pritet që të bëhet njeriu merkato i “topçinjve”, por ai më parë ka punuar me Luis Enrique-n, detaj ky që bën që spanjolli të jetë gjithnjë e më afër stolit.
Arsenali është një nga ato klube që shpenzojnë shumë, por nisur nga sezoni i fundit negativ dhe ndryshimi në stol, disa emra të mëdhenj do të largohen për tu dhënë hapësirë të tjerëve.
Luis Enrique fitoi me Barçën 1 Ligë Kampionesh, 2 La Liga dhe 3 Copa del Rey. Ai ka padurim që të rinisë të trajnojë sërish.
