Kur kanë kaluar një ditë nga ngjarja e rëndë në Kamzë, ku mbeti i vrarë 52- vjeçari Agim Buci dhe u plagos bashkëshortja e tij Merita Buci 44 vjeç nga autorë ende të paidentifikuar, të cilët shkuan për ti vjedhur, Boldnews.al ka mësuar të tjera detaje.
Nga sa mësohet, policia ka gjetur në vendngjarje vetëm një gëzhojë pistolete. Policia ka mundur të rindërtojë skemën e vrasjes.
Rindërtohet skema si ndodhi ngjarja
Pas këqyrjes së kamerave të sigurisë dhe dëshmisë së të afërmve dhe fqinjëve, grupi hetimor ka rindërtuar skenën si ndodhi vrasja e mbrëmshme në Kamëz, gjatë tentativës për grabitjen e një minimarketi. Fillimisht grabitësit janë futur në minimarket dhe i kanë kërkuar lekët Merita Bucit. Ajo ka ngritur duart lart dhe u ka thënë nuk kam lekë.
Më pas njëri prej grabitësve e ka qëlluar me pistoletë në këmbën e djathtë. Agim Buci ka qenë te pjesa e jashtme e marketit duke rregulluar arkat e fruta-perimeve.
Kur është futur në dyqan Agimi është përballur me grabitësit. Në një moment Agimi ka marrë thikën e djathit dhe ia ka drejtuar grabitësve. Këta të fundit e kanë qëlluar në pjesën e barkut 1 herë.
Më pas grabitësit janë trembur dhe kanë ikur me shpejtësi. Djali i vogël ka parë gjithë skenën kur është plagosur mamaja e tij dhe më pas është fshehur poshtë banakut. Djali ka parë edhe babin të mbuluar me gjak.
Kamerat e sigurisë filmuan ngjarjen
E gjithë skena e përleshjes dhe krimit të rëndë është fiksuar nga kamerat e sigurisë së marketit. Policia ka sekuestruar pamjet të cilat mund të hedhin dritë mbi karakteristikat fizike dhe identiktin e grabitësve. Policia ka vënë një shpërblim prej 5 milionë lekë të reja për këdo që do japë informacione të vlefshme cilat do çojnë në kapjen e autorëve.
Ndërkohë, djali i mitur i çiftit Buçi ndodhet në gjendje të rëndë psikologjike. Ai ka parë të atin të shtrirë përtokë dhe të gjakosur, ndërsa vetë është fshehur poshtë banakut në momentin kur prindërit e tij janë përleshur me grabitësit.
