Shkëlqim Tufa dhe familjarët e tij kanë 25 vite ose çerek shekulli nëpër gjyqe.
Shkëlqim Tufa bashkë me familjen e tij zotërojnë një pronë prej 1100 metrash katrorë në Tiranë që nga viti1954. Po nga ky vit një pjesë të banesës e lëshuan me qira. Marrëdhënia mes tyre vazhdoi normalisht deri në 1993, kur qiramarrësi vendosi të mos e paguajë më qiranë, sepse pretendonte që banesa nuk i përkiste pronarit. Gjyqet u fituan nga pronaret deri në Kasacion.
Në 2015 qiramarrësit, Pelushi i drejtohen hipotekës së Tiranës që t’i pajiste me certifikatë për një shtëpi prej 41 metrash katrorë, në truallin e Tufajve.
“Hipoteka i pajisi me një certifikatë për një ndërtesë që nuk ka ekzistuar kurrë”, thotë Tufa.
Në përgjigjet që kthente hipoteka e Tiranës, ndërtesa njëherë ishte 78 metra katrorë, njëherë 41 metra katrore. Dokumentet kishin një gjë të përbashkët, i referoheshin një ndërtese fantazmë.
“Kanë punuar nën presion e kanë pranuar edhe vetë”, shprehet ai.
Pas certifikimit të ndërtesës, familja Pelushi pajiset me një certifikatë tjetër pronësie.
“AKKP-ja i shet edhe 500 metra katrore truall dhe hipoteka e pajis me certifikatë. Nga qiraxhi, në pronar”, thotë qytetari.
Në 2017, Shkëlqim Tufa ju drejtua Njësisë së Transparencës dhe Antikorrupsionit në Kryeministri.
“Ata rekomanduan largimin nga puna të 2 punonjësve të hipotekës së Tiranës”, thotë Tufa.
Aktualisht Tufajt kanë bërë kallëzim në Prokurorinë e Tiranës për shpërdorim detyre nga ana e punonjësve të Hipotekës. Prokuroria ka kryer me atë të ekspertit të saj një akt ekspertimi të marsit të 2018 ku thuhet.
“Shtëpia nuk ekziston, atje kanë qenë gjithë kohën pemë”, thotë ai.
E ndërkohë që ecejaket nëpër prokurori e gjykatë vazhdojnë, familja Pelushi, sipas zotit Tufa, po nxiton të arrijë qëllimet e saj.
“Para tre ditësh po prisnin pemët, se duan ta bëjnë faktike, certifikatën e kanë në duar. Policia i mbështet. Po ne o do japim jetën, ose ajo shtëpi nuk ngrihet aty”, shprehet Shkëlqim Tufa.
