Mike Pompeo konfirmohet zyrtarisht Sekretar Amerikan i Shtetit, duke i dhënë fund betejës së gjatë burokratike midis republikanëve dhe demokratëve.
Senati amerikan votoi 57 me 42 pro emërimit të Pompeo-s në krye të diplomacisë. Ish-shefi i CIA-s mori 51 votat e senatorëve republikanë, plus 6 vota nga Partia Demokratike. Kjo e fundit gjatë seancës dëgjimore në Kongres e sulmoi ashpër Pompeo-n duke e cilësuar një grabitqar lufte dhe një mbrojtës të anti-muslimanëve dhe homofobeve.
Konfirmimi i Mike Pompeo-s plotëson delegacionin amerikan në prag të Samitit të ministrave të jashtëm të NATO-s, që do të zhvillohet në Bruksel.
Presidenti Donald Trump e përshëndeti përmes Tuiterit zyrtarizimin e Sekretarit të ri të Shtetit, për të cilin tha se “do të vendosë interesin e Amerikës gjithmonë në vend të parë”.
Ndonëse nuk ishte emëruar ende Sekretar Shteti, Mike Pompeo udhëhoqi bisedimet me Korenë e Veriut, duke i hapur rrugë një marrëveshjeje me vendin komunist dhe takimit historik mes Donald Trump dhe Kim Jong-un.
Mike Pompeo zëvendëson në këtë detyrë Rex Tillersonin, i cili u shkarkua nga Trump muajin e kaluar.
