Liga e Kampioneve tregon Kristiano Ronaldon më të mirë.
Jo vetëm gola dhe performanca spektakolare, por edhe shumë kilometra të përshkruar. Në këtë sezon të Ligës së Kampioneve ka gjetur rrugën e rrjetës 15 herë duke qenë goleadori i këtij kompeticioni. Por, surpriza është te kilometrat që ka bërë ylli portugez në 10 ndeshjet e luajtura deri tani.
Ai ka luajtur në të gjitha ndeshjet nga fillimi në fund në Ligën e Kampioneve dhe kjo ka bërë që të jetë i pari në listën e futbollistëve që ka vrapuar më shumë në kampin madrilen, 92 kilometra dhe 142 metra. Një shifër e përafërt me distancën nga Tirana në Pogradec (84 km), ose Tiranë-Shkodër (86 km). Kjo distancë e madhe shpjegohet me faktin që Ronaldo i ka luajtur të gjitha ndeshjet në Ligën e Kampioneve, por edhe me motivimin që ka ai për të bërë histori në këtë kompeticion.
Lojtari i dytë në listën e atyre që vrapojnë më shumë është Kasemiro, i cili për pak metra nuk ka arritur dot kuotën 90 kilometra. I treti është gjermani Toni Kros, që ka përshkruar 86.349 kilometra dhe sot rikthehet të sfidojë ish-skuadrën e tij. Kristiano është një atlet i shkëlqyer dhe diçka të tillë e ka konfirmuar mbrojtësi i Bajernit, Boateng. Ky i fundit thotë se mund të shihet diçka e tillë kur ai heq fanellën pas golave. Për Bajernin, rreziku është konstant dhe ka emrin Kristiano Ronaldo.
KUNDËR GJERMANËVE
Kristiano Ronaldo sheh ekipet gjermane dhe transformohet. Në 22 ndeshje të luajtura kundër tyre, sulmuesi portugez ka arritur ta dërgojë topin në rrjetë 26 herë. Kjo do të thotë se ai shënon mesatarisht 1.18 gola kundër skuadrave gjermane. Bajerni është një nga “viktimat” e preferuara të yllit madrilen në Europë. Vitin e kaluar nga 6 gola në total që shënoi Reali, 5 mbanin firmën e tij. Në total, skuadrës bavareze ka arritur t’i shënojë 9 gola në 6 përballje. Dhe për më tepër goli i tij i 100-të në Europë u shënua në portën e Bajernit. Ai i ka shënuar gjithashtu Shalkes dhe Borusias.
