Presidenti i Shqipërisë, Ilir Meta, ka qenë sot në Prrenjas ku ka dhënë nga atje një mesazh të fortë, ndërsa ka shprehur bindjen se i kanë të gjitha mundësitë për çeljen e negociatave.
Presidenti Meta është pritur në sheshin kryesor të qytetit nga kryetarja e Bashkisë, Miranda Rira, ndërsa është takuar me dhjetëra banorë.
I shoqëruar nga ambasadori i Republikës së Turqisë në vendin tonë, Ahmet Yoruk, kanë qenë të pranishëm në inaugurimin e çerdhes së qytetit të rikonstruktuar me fondet e shtetit të Turqisë.
Duke falënderuar Turqinë për bujarinë sa i përket ndihmave financiare, Meta, ka folur edhe për hapjen e negociatave me BE-në, duke kërkuar perqendrim në thellimin e reformave për përmbushjen 5 prioriteteve kyçe.
“Të përqendrohemi në thellimin reformave për përmbushjen 5 prioriteteve kyçe. I bindur që i kemi të gjitha mundësitë për çeljen e negociatave. Tē evitojmë çdo lloj polemike e të përqendrohemi në objektivin e integrimit europian”, – ka thënë Meta, i cili më tej ka shtuar: “Falenderime dhe mirënjohje të sinqertë për bujarinë e shtetit të Turqisë për ndihmat financiare”.
Ndërsa nga ana tjetër, ambasadori turk në fjalën e tij ka pohuar: “Jam tejet i kënaqur të jem sot në krah të Presidentit Meta, personalitet e mik i madh i Turqisë. Marrëdhëniet midis dy vendeve tona, shume te ngushta e vëllazërore”.
