Partizani nuk ka arritur të fitojë në ndeshjen e ndeshjme ndaj Skënderbeut, ku këtyre të fundit u ka mjaftuar një gol në “in extremis” për të marrë tre pikët.
Mirëpo, sipas gazetarit të RTSH, Ervin Baku ky nuk është lajmi kryesor. Ai ka hedhur akuza mbi deputetin Erjon Braçe, njëherësh edhe një tifoz i flaktë i Partizanit se ka goditur me çakmak arbitrin e ndeshjes Andi Koçi. Baku e ka quajtur një gjest të shëmtuar të deputetit.
Postimi i plotë
Gjesti i shëmtuar i deputetit
TURP! ERJON BRAÇE GODET ME ÇAKMAK ANDI KOÇIN
U luajt ndeshja Partizani – Skënderbeu. Më e rëndësishmja e javes së 30-të të Kategorisë Superiore në futboll. Isha në stadium. Në tribunën e shtypit. Ndeshja përfundoi. Si përfundoi? Fitoi Skënderbeu 0-1. Po kjo për mua nuk ka absolutisht asnjë rëndësi. Si në çdo ndeshje, në tribunë ishte edhe deputeti Erjon Braçe. E respektoj si ligjvënës aktiv, të mirë, të vendit tim. E respektoj edhe pasionin e tij për futbollin. Por sot deputeti Braçe bëri një gjest të shëmtuar.
Shumë të shëmtuar. Në përfundim të ndeshjes goditi me çakmak gjykatësin e ndeshjes Andi Koçi. Si ka mundësi??? Si??? Deputeti duhet të ulë gjakrat e tifozëve të irrituar. Jo të ndezë gjakrat. Nuk më intereson fare si gjykoi Andi Koçi. Fare. Edhe sikur ta ketë bërë “baltë”… Deputeti duhet të jetë “model” për shoqërinë. Kudo. Edhe në stadium. Kushdo qoftë ai. Edhe tifoz i Partizanit.
