Në konferencën e përbashkët për shtyp me Kryeministrin e Belgjikës Charles Michel, shefi i qeverisë shqiptare, Edi Rama dha lajmin e mirë se Belgjika e mbështet procesin e integrimit të Shqipërisë në BE.
“Kryeministri i Belgjikës e dha dhe e mbajti fjalën brenda një kohe të shkurtër duke ardhur sot të vizitojë Tiranën dhe duke riafirmuar miqësinë që na lidh dhe vullnetin e dëshirën e vendit që ai udhëheq për të forcuar marrëdhëniet me Shqipërinë. Jemi takuar në mënyrë të përsëritur së fundmi dhe kemi diskutuar për perspektivën evropiane të Shqipërisë dhe për të rritur nivelin e bashkëpunimit ekonomik dhe tregtar. Ndamë mendimin se me marrjen e këtij rekomandimi nis një fazë e re për vendin sepse i gjithë procesi për integrimin është për ardhmërinë e vendit të bazuar në një shtet modern dhe institucione demokratike dhe nga ana tjetër folëm për sfidat e mëdha që lidhen me këtë proces në vijim. Edhe sot e kam falenderuar për mbështetjen e tij të vazhdueshme, inkurajimet dhe qëndrimin ndaj procesit të zgjerimit në tërësi.
Besojmë që Shqipëria meriton një vendim për të hapur negociatat natyrisht jemi të vetëdijshëm që hapja e tyre s’është fundi i përpjekjeve tona por fillimi i një faze të re dhe të gjatë përpjekjesh. Jemi të sigurt se kemi edhe mbështetjen e Belgjikës dhe miqve e partnerëve tanë evropianë”. Kryeministri belg në fjalën e tij tha: Sa i përket çështjes së emigracionit, duhet të theksoj përpjekjet që janë realizuar nga autoritetet për të pasur një partneritet të ndershëm. Belgjika e konsideron Shqipërinë si një vend të sigurt dhe është me rëndësi të punojmë së bashku për të lëshuar mesazhe për të parandaluar format e emigracionit ilegal. Përpjekjet e bëra janë vlerësuar.
Javën e ardhshme do të ketë diskutime të rëndësishme politike në një samit në Bruksel, do merret vendim në qershor dhe ramë dakort të ruajmë një dialog të ngushtë me kryeministrin për të nxitur zhvillimet lidhur me këtë vendim që do merret në qershor. S’mund të them një vendim zyrtar, me shumë qartësi them se ne dëshirojmë të vazhdojmë përpjekjet për afrimin e BE me Shqipërinë dhe aftësinë për të thelluar reformat brenda BE dhe për të nxitur thellimin e përpjekjeve brenda Shqipërisë për të dhënë një sinjal pozitiv. Për të marrë përgjegjësitë për zbatimin e reformave.
Vizita ime sot në Shqipëri s’është rastësi, e pranova me kënaqësi ftesën që m’u bë për të dhënjë një sinjal miqësie e vlerësimi nga BE për përpjekjet që janë kryer. Me rëndësi është se fillimi i një procesi anëtarësimi është vetëm fillimi, jo mbërritja. S’mund ta vë qerren përpara kaut, është në fillim mbledhja e qeverive të vendeve anëtare të BE…do të jap rreth tryezes së BE një mesazh vullneti dhe përpjekje. Bëj pjesë te ata që mendojnë se duhet të njihen përpjekjet që janë kryer me rezultate të dukshme”
