“Nuk e di nëse do të jetë vendimtare ndeshja e fundit kundër Lazio-s, por di që ka shumë ndeshje të tjera që janë të rëndësishme, për shembull ajo e së shtunës kundër Juventusit: nëse në dy ndeshjet e ardhshme, njëra do të marrë gjashtë pikë dhe tjetra një, atëherë do të jemi jashtë garës për në Champions League. Ne duhet që të arrijmë që të përmirësohemi. Që nga ndeshja e fundit kemi kuptuar se mund t’ia dalim deri në fund, pasi i kemi cilësitë për të arritur qëllimin. Duhet të kemi më tepër kontrast brenda skuadrës, sepse na duhet karakter i fortë për të marrë përgjegjësitë në këto ndeshje. Analiza e bërë për muajt e fundit tregon se ne mund t’ia dalim”, tha trajneri Luciano Spalletti pas fitores kundër Chievo-s në Verona për llogari të javës së 34-t të Serie A.
Me këtë fitore Spalletti i gëzohet skuadrës pasi po qëndrojnë në një hap me Roma-n dhe Lazio-n, ekipet që i ka rivalë për garën për Champions League. Falë Icardi-t dhe Perisic arriti që të fitojë këtë takim, ku për të dy pas ndeshjes tha: “Icardi dhe Perisic janë lojtarë shumë të rëndësishëm për skuadrën tonë”, nënvizoi tekniku i zikaltërve.
“Kur skuadra arrin që ta dërgojë topin në rrjetë, ky është qëllimi: është merita e lojtarëve të veçantë dhe sigurisht që të arrish avantazhin është dhe meritë e skuadrës në tërësi. Mauro është një lojtar i fortë që ka bërë gola me rëndësi, edhe Ivan, por loja në mënyrë totale bën diferencën. Në fund nuk është gjuajtur mirë topi drejt portës ndaj jemi ndjerë në vështirësi”.
“Rafinha? Ka bërë një ndeshje të mirë në aspektin e ngjitjes së skuadrës duke zotëruar mirë topin, gjithashtu ka ndihmuar edhe në mbrojtje ku ka bërë ndërhyrje vendimtare. Ai, së bashku me Brozovic kanë bërë lojë të mirë dhe i kanë dhënë një dorë të rëndësishme skuadrës në këtë ndeshje”, përfundoi Spalletti.
