Kryeministri Edi Rama njoftoi sot pas mbledhjes së qeverisë të zhvilluar në Fier, se ishte miratuar lista e re e barnave të rimbursueshme. Rama tha se lista është zgjeruar për të mbuluar më shumë nevoja të qytetarëve.
“Përvecc 36 barnave të reja që do të rimbursohen nga shteti, do të përfshihet si një zgjidhje përfundimtare, Herceptina, një medikament jetësor në luftën kundër kancerit të gjirit”, tha Rama.
Por lidhur me këtë deklaratë zyrtare të Kryeministrit, ka reaguar Tritan Shehu, deputet i PD-së.
Sipas tij, herceptina është dhënë falas dhe përmes një postimi në rrjetet sociale i drejtohet Qeverisë.
“Ju deklaroni se do të fusni në listën e barnave të rimbursueshme edhe Herceptinën! Lojë fjalësh kjo nga ana juaj. Herceptina është medikament spitalor dhe gjithmonë ka qenë ofruar gratis për pacientët, pra nuk ka asnjë vlerë nëse do t’ja ngarkoni Fondit, apo do ta përballojë spitali pagesën”, shkruan ai.
Shehu mirëpret miratimin e listës së barnave të rimbursueshme, por thotë se është shkelur ligji pasi ka që në 2016 që kjo listë nuk është shpallur dhe vetëm nga lëvizja e kursit të këmbimit, buxheti i shtetit ka humbur miliona euro.
