Te Milani e kanë pranuar. Nga UEFA do të ketë masa ndëshkimore për shkak të shkeljeve të mëparshme të fair play-t financiar.
“Sanksionet? Milani i menaxhuar në sezonet e mëparshme nuk kishte respektuar parametrat dhe është e kuptueshme, madje e sigurt që në propozimet për akord do të ketë të tilla. Urojmë që të mos ta teprojnë. Ne patëm një takim me përfaqësuesit e UEFA-s, ku i informuam për menaxhimin dhe gjendjen ekonomike. Shkoi më mirë se sa parashikimi që ata kishin në dorë. Ne riprezantuam planin për vitet e ardhshme dhe pati një diskutim të gjatë dhe të detajuar.Pastaj u ndamë me respekt të madhe në pritje që ata të bëjnë vlerësimet e tyre dhe të kthehen te ne me propozime”, deklaroi administratori i deleguar i kuqezinjve, Marco Fassone.
Kurse përgjigja e UEFA-s do të vijë në maj. Te Milani e bënë të qartë se prania e Elliott do të thotë siguri ekonomike dhe garanci.
Merkato – “Sa i përket nevojave teknike, Milani nuk është i detyruar që të shesë. Qëllimi është që të blihen 2-3 lojtarë, duke lënë të lirë të njëjtin numër. Sigurisht që nuk do të bëhet merkatoja e sezonit të kaluar. Spektaklin e bëmë. Tani do të bëjmë dy a tri goditje, nuk mendoj se duhen më shumë, të përmirësohemi aty ku kemi probleme”.
