Ish-futbollisti i mirënjohur egjiptian, Mido, i cili ka luajtur për skuadra si Celta Vigo, Roma, Ajax dhe Tottenham Hotspur, ka vlerësuar bashkatdhetarin e tij Mohamed Salah për vlerat e jashtëzakonshme që sulmuesi i momentit në Premier League ka treguar gjatë këtij sezoni për Liverpool-in.
“Të jem i sinqertë kam qenë i shqetësuar, për faktin se Salah nuk do t’ia dilte dot tek Liverpool, por ai ka treguar se është gati të bëjë hapin e madh në karrierë”, – deklaroi Mido, i cili aktualisht është trajneri i klubit egjiptian Zamalek, gjatë një interviste për “King Fut”.
Mido gjithashtu e bëri të qartë se cili mund të jetë niveli tjetër për Salah. “Real Madrid është vënë në ndjekje të tij”, – tha ai.
“Të gjithë i kemi parë ndeshjet e këqija të Gareth Bale dhe Karim Benzema, kur Reali ka luajtur me formacionin 4-4-2. Jam i sigurt që Madridi do të jetë i aftë për të marrë maksimumin nga aftësitë e Salah”.
Ish-sulmuesi i njohur gjithashtu beson se ylli i Liverpool është një lojtar shumë më i mirë se ai.
“Unë e di shumë njerëz nuk do të jenë dakord me mua për këtë, por sipas mendimit tim Mohamed Salah është futbollisti më i mirë në historinë e Egjiptit”, – deklaroi ai.
“Salah është shumë më i fortë se unë dhe në aspektin psikologjik. Kur isha i ri unë nuk kam marrë ndonjë këshillë të vlefshme dhe kjo gjë më ka shkaktuar dëme të shumta. Aftësitë e Salah viheshin re qëkur ai luante për Chelsea-n”, – shtoi Mido duke iu referuar periudhës kur Salah drejtohej nga Jose Mourinho.
