Makina e një emigranti në Korçë është grabitur dhe më pas është shkrumbuar nga zjarri.
Mësohet se persona ende të paidentifikuar, pasi kanë marrë shumën prej 1000 erosh në automjetin tip “Audi” në pronësi të 26-vjeçarit Denis Duro, e kanë mbushur atë me kashtë dhe i kanë vënë zjarrin.
Burime zyrtare nga Drejtoria e Policisë së këtij qarku bënë me dije se ngjarja ka ndodhur në orët e para të mëngjesit të djeshëm në fshatin Belorta, vetëm pak kilometra larg qytetit juglindor. Sipas bluve, rreth orës 02:00 është përfshirë nga flakët makina e të riut, emigrant në Greqi.
Mësohet se automjeti me targë IBI 4224 ishte parkuar në afërsi të banesës së familjes Duro. Pas sinjalizimit të marrë, policia ka shkuar shpejt në vendngjarje dhe ka nisur hetimet.
“Nga të dhënat e para si edhe ekspertiza e kryer në vendngjarje, dyshohet se zjarrvënia mund të ketë qenë e qëllimshme. Po punohet për identifikimin e kapjen e autorëve si edhe përcaktimin e shkaqeve të rënies së zjarrit”, thuhej në njoftimin zyrtar të policisë.
Ndërkaq, burime pranë grupit hetimor pohuan se fillimisht autorët kanë hapur njërën nga dyert e “Audi”-t me mjete të forta dhe kanë marrë një sasi prej 1 mijë eurosh, një pasaportë greke të pronarit të mjetit si dhe një aparat celular.
Më pas për të zhdukur gjurmët, autorët e kanë djegur automjetin dhe janë larguar me shpejtësi nga vendngjarja.
Ndërkaq, në lidhje me këtë ngjarjeje kanë reaguar familjarët e 26-vjeçarit, i cili kishte pak ditë që ishte kthyer nga Greqia. Ata pohuan se janë ngritur nga gjumi pasi kanë dëgjuar zhurmë teksa digjej makina.
Nëna e të riut, Lindita Duro deklaroi për “Gazeta Shqiptare” se djali dhe familja e saj nuk kanë probleme me askënd. Ajo u shpreh se autorët kishin vjedhur brenda në makinë 1000 euro, pasaportën greke të djalit të saj dhe një telefon.
“Kërkoj të zbardhet sa më shpejt ngjarja, në të kundërt do i gjej vetë autorët dhe do i djeg siç me dogjën makinën e tim biri”, tha Lindita Duro.
Mësohet se gjatë orëve të natës të së mërkurës në fshatin Belorta kanë ndo-dhur 4 vjedhje, ku përveç makinës që iu flaka, u vodh një mjet tjetër, ndërsa u bastisën dy banesa.
