Nga Boldnews.al
Ish-ministri i Brendshëm Saimir Tahiri, i vënë nën hetim nga Prokuroria e Krimeve të Rënda është rikthyer i qeshur në Kuvend, pas një mungese të gjatë. Një ditë pasi Shqipëria mori rekomandimin pozitiv nga Këshilli i Europës për hapjen e negociatave, Tahiri ju rikthye jetës parlamentare edhe pse është i dyshuar për lidhjet me trafikun ndërkombëtar të drogës nëpërmjet grupit të “Habilajve”.
Po një ditë më parë ai u mor sërish në mbrojtje nga Kryeministri Edi Rama, i cili tha se është në pritje që Prokuroria të çojë qoftë edhe një provë për ish-ministrin e tij, të cilin e konisderonte si më të suksesshmin në këto 25 vitet e fundit. Rekomandimi dhe mbrojtja e shpatullave nga Kryeministri, ka bërë që Tahiri të rishfaqet në sallën e Kuvendit.
Ai sfidoi drejtësinë dhe komunitetin Europian, përfaqësues të të cilit, në jo pak raste kanë shprehur shqetësim për mosndëshkimin e tij pas zbulimit të përgjimeve që dyshohet se e implikojnë atë në trafik ndërkombëtar droge. Por Tahiri u shfaq jo vetëm i qetë, por edhe i qeshur, çka tregon se mesazhet e tij publike dhe private kanë funksionuar.
Në daljen e parë për mediat një ditë përpara shqyrtimit të kërkesës së prokurorisë për arrestimin e tij, Tahiri dha disa mesazhe të koduara të cilat janë vlerësuar në mënyrën e duhur nga ish-shefi i tij. Po ashtu nuk kanë munguar as komunikimet jo publike mes tyre, ku shpesh janë përdorur edhe emisarë për të transmetuar ato që di ish-ministri i Brendshëm. Ai vetë ka lënë të kuptohet se di jo pak.
