Drejtuesit e Borusia Dortmund kanë bërë një përpjekje të përbashkët në javët e fundit për të joshur sulmuesin Patrick Cutrone t’u bashkohet verdhezinjve në merkaton e verës shkruan “Calciomercato.com”.
Sulmuesi i talentuar po shkëlqen me kuqezinjtë. Me golat e tij Milan ëndërron pjesëmarrjen në kompeticionet evropiane.
Agjenti i 20-vjeçarit ka mbyllur negociatat me kuqezinjtë për një kontratë të re për disa javë, por palët ende nuk janë dakord me kushtet, që do ta shihnin lojtarin të qëndrojë në “San Siro” për pesë apo gjashtë vitet e ardhshme.
Në të vërtetë, Borusia Dortmund janë të dëshpëruar për të nënshkruar të paktën me një sulmues të ri para fillimit të sezonit të ardhshëm, duke pasur parasysh faktin, se ata ende nuk e kanë zëvendësuar Pierre-Emerick Aubameyang, i cili u bashkua me Arsenalin në Premier League në merkaton e janarit.
Drejtori sportiv Michael Zorc e di se do të jetë shumë e vështirë për të blerë Michy Batshuayi nga Chelsea në fund të sezonit, prandaj ai ka filluar procesin e identifikimit të objektivave alternative, pasi drejtuesit duan të ndërtojë një skuadër të aftë për të sfiduar sërish Bayern Munchen për titullin e Bundesliga.
Në krye të listës qëndron Cutrone, por ai duket se dëshiron të qëndrojë në ekipin e tij të djalërisë dhe nuk është i gatshëm të marrë në konsideratë ndonjë gjë tjetër për momentin.
Borusia do të duhet të derdhë shumë ‘djersë’ për të joshur 20-vjeçarin që t’i bashkohet verdhezinjve në merkaton e ardhshme.
Gjithsesi në rast se ata kualifikohen në Champions League dhe Milan dështon, do të jetë një plus për gjermanët.
Në këtë edicion Patrick Cutrone e ka gjetur rrugën e rrjetës 7 herë në Serie A në 24 ndeshje të aktivizuara, prej të cilave vetëm 13 si titullar. Gjithashtu italiani ka shënuar edhe 6 gola në 13 ndeshje në Europa League.
