Komisioni Europian rekomandoi hapjen e negociatave të anëtarësimit me Shqipërinë, por kushtëzon ecurinë e këtyre negociatave me mbarëvajtjen e mëtejshme të reformës në drejtësi, sidomos procesit të vettingut.
Në raportin prej 37 faqesh, KE kërkon arrestimin e “peshqve të mëdhenj”, ndërsa përmendet dhe ish-ministri i Brendshëm, Saimir Tahiri.
Komisioni Europian vëren se “përpjekje të mëtejshme të vendosura u ndërmorën në luftën kundër korrupsionit dhe krimit të organizuar, përfshi ato kundër trafikut të drogës dhe kultivimit të saj, duke kontribuar drejt arritjeve solide në hetime proaktive, arrestime e dënimeve”.
Katër pjesëtarë të parlamentit dhe një kryetar bashkie, theksohet mes të tjerash, i humbën mandatet gjatë procesit të dekriminalizimit dhjetorin e 2016-tës dhe janarin e 2018-tës.
Me kërkesë të Prokurorisë, vazhdon raporti, tetorin e vitit 2017 Parlamenti i hoqi pjesërisht imunitetin deputetit Saimir Tahiri, ish-ministër i Brendshëm.
Por këtë të mërkurë kryeministri Rama ka folur për “ministrin e tij më të mirë” të mandatit të parë. Sa i përket arrestimit të Tahirit, kryeministri tha se prokuroria nuk ka sjellë asnjë provë.
Edi Rama: Gjermania nuk është një vend skeptik për zgjerimin, përkundrazi Gjermania është një vend kampion për projektin e Europës së bashkuar. Dhe kancelarja gjermane është prej kohës në krye të këtij projekti, dhe ka marrë lidershipin për të shpallur një raport të ri me Ballkanin Perëndimor. Në Gjermani, si në vendet e tjera ka individë që janë skeptikë. Dhe ka forca që janë kundër zgjerimit. Një forcë që ka hyrë kohët e fundit, është një kërcënim për projektin e zgjerimit. Por edhe brenda koalicionit, ka individë, që ne i njohim, që janë skeptikë. Që ushqehen nga propaganda që fola më parë, ashtu sikundër ka deputetë që kanë bërë fushatë kundër nesh vitin e kaluar. Është normale. Por në këtë proces vlejnë argumentat. Dhe është shumë e rëndësishme se në procesin e Saimir Tahirit, Kuvendi dhe shumica qeverisëse ka zbatuar në frymë dhe në gërmë, gjithçka ku Komisioni i Venecias ka përcëktuar kur parlamenti thirret për të shqyrtuar masën e arrestit për një deputet. Së dyti, ne po presim që Prokuroria të rikthehet me të paktën një provë. Jo 10, por të paktën një provë. Dhe Prokuroria e Krimeve të Rënda është shumë larg të qënurit një trupë influencuese, për sa i përket anës së shumicës. Së treti, është gjëja më e lehtë që të nxirren bishta, e të nxirren alibira, e të krijohen pseudoargumenta, përballë faktit që Shqipëria i ka bërë detyrat një më një, dhe ka marrë dëftesën nga Komisioni më i pamëshirshëm i BE. Pra në këtë aspekt ne e kemi bërë detyrën tonë. Tani jemi në aspektin e lojërave, e fijeve. Thënë të gjitha këto, unë po ju them se Shqipëria sot nuk është ajo që ishte dje. Dhe ne sot jo vetëm jemi gati, por hyjmë në një fazë të re konkrete për të hyrë në hapjen e negociatave. Përpjekjet për të na ndaluar, jo për arsyen tonë, por nga më të ndryshmet, do të ketë. Patjetër, por në do t’i kapërcejmë të gjitha.
