Deputetja e LSI-së, Klada Gjosha, ka reaguar përmes një deklarate lidhur me rekomandimin e Komisionit Europian për çeljen e negociatave me Shqipërinë. Gjosha tha se Shqipëria e kishte marrë rekomandimin për hapjen e negociatave që në nëntor të vitit 2016, ndërsa sot është rikonfirmuar i njëjti vendim.
“Ky është një lajm i mirë për shqiptarët, por në të njëjtën kohë është një detyrim dhe përgjegjësi për të përmbushur detyrimet që burojnë nga ky proces. Ndërkohë që rekomandimi është nujëra anë e medaljes, mbledhja e Këshillit Europian në qershor mbetet një tjetër sfidë ndaj qeverisë shqiptare”, tha Gjosha.
Në këtë kuadër ajo theksoi se vullneti i mirë, modestia dhe serioziteti duhet të jenë tiparet që duhet të udhëheqin këtë proces.
Sipas ish-ministres së Integrimit, lidhja e politikës me krimin, korrupsioni, çështja e pronave, ngritja e mekanizmave të kontrollit për azil kërkuesiteth, mbeten ende problematike.
“Rekomandimi pozitiv sot nuk vjen as për qeverinë dhe as për opozitën, ai u takon qytetarëve shqiptarë”, tha Gjosha.
