Deputeti Vangjel Tavo apel, mbroni mjekët – mbroni heronjtë e heshtur.

Bluzat e bardha, heronjtë e heshtur të Gjirokastrës dhe mbarë vendit vazhdojnë të diskriminohen, shkruan Vangjel Tavo në profilin e tij zyrtar në facebook.
Figali Bashari, mjeke e njohur nefrologe në Gjirokastër largohet nga puna me urdhër të Ministrisë së Shëndetësisë. Për afro 40 vite kjo mjeke e shquar i ka shërbyer pacientëve dhe komunitetit, dhe në vend që të vlerësohet, detyrohet të largohet nga puna – në vend që të mbahet e çmohet e të mos largohet siç po bëjnë gjithnjë e më shumë mjekët dhe specialistët, ministria bën të kundërtën e asaj për çfarë ka nevojë komuniteti i qarkut të Gjirokastrës.
Doktoreshë Bashari, shkruan Tavo, meriton respektin tonë e mirënjohjen e thellë për të gjithë kontributin që ka dhënë gjatë katër dekadave, e asnjë urdhër largimi nuk mund të ulë profesionalizmin dhe kontributin e saj të vyer. Kjo doktoreshë, e të gjithë bluzat e bardha në mbarë qarkun tonë e mbarë Shqipërinë meritojnë të trajtohen me dinjitet dhe respekt.
Shëndeti nuk ka ngjyra partiake – jeta e njeriut nuk është krijuar nga politika, ndaj bluzat e bardha janë të gjithë heronj pa ngjyra politike por vetëm pro-jetës dhe pro-sakrificës, ndaj të gjithë duhen respektuar e lejuar të bëjnë atë që dijnë të bëjnë më mirë: të kujdesen për njerëzit dhe të shpëtojnë jetë njerëzish.
Respekte për doktoreshë Figali Bashari, e për të gjithë heronjtë e heshtur të vendit, e një apelim Ministrisë së Shëndetësisë për ta tërhequr urdhërin e dhënë në këtë rast e në çdo rast tjetër që prek sado pak dinjitetin e mjekut.