Teuta ka thyer Vllazninë në duelin e fortë të mbijetesës dhe ngjitet në kuotën e 33 pikëve, po aq sa kanë edhe shkodranët. Në “Niko Dovana”, “djemtë e detit” kërkojnë dhe gjejnë dy gola që në pjesën e parë dhe me këtë rezultat arkivojnë 3 pikë të arta në luftën për mbijetesë.
Ndeshja nis e qetë me disa tentative të vakëta të miqve, siç ishte rasti i Krymit në minutën e 12-të, por gjuajtja e mesfushorit u kontrollua pa vështirësi. Teuta e ngre me kalimin e minutave nivelin e lojës, por përpara se të vijmë tek goli, kemi një rast ideal shënimi për Hilën, që shërbehet shumë mirë nga Latifi, por ndonëse gjendet në zonë, nuk shënjestron kuadratin.
Minuta e 32-të dhe Sherri bën gjysmën e punës për Teutën. Gardiani shkodran nuk del ashtu siç duhet nga porta dhe i jep mundësi Hërkaç, që me kokë të kalojë në epërsi durrsakët. Kur mendohej se pjesa e parë do të mbyllej me epërsinë minimale të të zotëve të shtëpisë, Latif detyron Sherrin të presë me vështirësi gjuajtjen e tij dhe me topin e mbetur në zonë, është Hakaj që mbërrin i pari dhe e shtyn në rrjetë.
Nuk gëzon shkodrani, por Teuta është pranë një fitoreje të rëndësishme. Pjesa e dytë nis me të njëjtat formacione si edhe e para. Në minutën e 60-të Dediç provon nga goditja e dënimit, por topi kthehet në hyrje të zonës nga shkodranët. Më pas, Çyrbja godet përsëri, por jashtë portës. Vllaznia përpiqet të ndryshojë diçka në rrjedhën e këtij takimi.
Fillimisht Çinari, i sapo futur në fushë gjuan në duart e Moçkës, ndërsa në minutën e 66-të është Tafili nga një goditje e lirë nga shumë larg portës, provon direkt, por pa probleme për portierin e Teutës. Minutat e mbetura nuk do të dhurojnë më raste për kronikë, ndërsa me këtë ndeshje mbyllet dhe java e 29-të e superiores. Teuta dhe Vllaznia tashmë ndajnë vendin e parafundit me 33 pikë, ndërsa Kamza ndjen rrezikun e tyre pasi është vetëm 1 pikë më shumë.
