Ministri i Jahstëm francez, Jean-Yves Le Drian, ka reaguar pas sulmit në Siri, ku Franca iu bashkua aleatëve të saj SHBA-ve dhe Britanisë.
Në një deklaratë për mediat, ministri Drian tha se sulmet ishin “të ligjshme”, “proporcionale” dhe “të precizuara”.
Ndërkohë ministrja e Mbrojtjes, Florence Parly tha se një flotë e marinës franceze në Mesdhe dhe avionë luftarakë nga bazat në Francë ishin ato që vunë në shënjestër qendrën kryesore kërkimore të armëve kimike në Siri.
Mes të tjerash Florence Parly pohoi se Franca nuk do donte konfrontim dhe përshkallëzim të situatës, duke shtuar se Rusia ishte paralajmëruar për sulmin.
Ndërsa Ministria e Mbrojtjes e Rusisë tha se shumica e raketave të hedhura në Siri nga Mbretëria e Bashkuar, SHBA dhe Franca u interceptuan nga sistemet siriane të mbrojtjes ajrore.
Njësitë ruse të mbrojtjes ajrore nuk ishin përfshirë në aksion kundër sulmit.
Avionët luftarakë dhe anijet e SHBA dhe aleatëve të saj nisën mbi 100 raketa të lundrimit dhe raketa ajrore në objektet civile dhe ushtarake siriane, tha ministria.
Ato u hodhën nga dy anije amerikane të stacionuara në Detin e Kuq, me mbështetje ajrore taktike nga aeroplanët e Mesdheut dhe Rockëell B-1 Lancer nga koalicioni në provincën Homs të Sirisë, sipas deklaratës.
