Pronari i lokalit në Fier i cili u sulmua me armë zjarri dy ditë më parë thotë se nuk ka probleme me askënd. Jashtë kamerave, Agim Boriçi, ka deklaruar për gazetarët se nuk ruhet nga askush se ka bashkëpunuar me policinë për zbardhjen e të vërtetës.
Agim Boriçi: Nuk ruhem nga askush. Mendoj se ajo çka ka ndodhur nuk ka të bejë me personin tim dhe familjen time. Ne jemi Boriçtë e Fierit dhe nuk kemi te bejmë me Boriçte e Lushnjes, qe e kane lidhur edhe me banden e Lushnjes. Nuk jam person ne kerkim dhe nuk kam probleme me drejtesine. Jam babai i tre femijeve dhe bej nje jete normale. Dua qe drejtesia te nxjerr ne drite te verteten. Kemi bashkepunuar me policine ne çdo hap.
Boriçi ka treguar më tej se në momentin e ngjarjes ka qenë lokal por fatmirësisht nuk ka pasur klientë të pranishëm gjatë të shtënave me armë.
Agim Boriçi: Isha ne lokal ne momentin e ngjarjes dhe fatmiresisht nuk ka pasur nxenes e mesues. Nuk ka pasur shkembim zjarri, vetem te shtena nga jashte. Jemi habitur çfare kemi degjuar. Eshte abuzuar me ngjarjen dhe te pergenjeshtrohet pjesa e pavertete e historise.
Ngjarja u shënua të mërkurën. Nga mjeti RENAULT, me targë greke YNK 1329 u qëllua në lëvizje ndaj lokalit në lagjen 8 Shkurti, në pronësi të shtetasit Agim Boriçi.
Menjëherë pas sulmit, autorët, numri i të cilëve ende nuk dihet u larguan në drejtim të semanit dhe 5 minuta më vonë i vunë flakën makinës në lagjen “15 Tetori”.
Brenda mjetit kishin lënë edhe armën që dyshohet se u përdor për sulmin dhe një karikator me fishekë, që shpërthenin here pas here duke u kthyer në rrezik potencial kalimtarët, median e policinë që mbërritën të parët në vendngjarje.
