Papa Françesku ka kërkuar falje dhe është shprehur se ka bërë “gabime serioze”, në rastin e abuzimit të supozuar të fëmijëve, nga kleri katolik në Kili.
Në një letër për peshkopët e vendit të Amerikës së Jugut, Papa tha se ndjeu “trishtim dhe turp” për komentet e bëra më parë, ku akuzoi viktimat se po shpifnin.
Letra, e publikuar nga Kisha në Kili, tha se Papa do t’i ftonte disa nga viktimat e abuzuara në Romë.
Një peshkop në Kili, Juan Barros, akuzohet për fshehjen e abuzimeve nga një prift.
Papa Françesku akuzoi viktimat për shpifje, gjatë një vizite në Kili në janar.
Duke mbrojtur peshkopin Barros, ai tha: “Nuk ka as një provë të vetme kundër tij, gjithçka është shpifje”.
Peshkopi Barros nuk është akuzuar për abuzime, por se ka qenë i pranishëm kur një tjetër prift, Fernando Karadima, ka ngacmuar djemtë e rinj në Santiago, në fillim të viteve 1980-të.
Ati Karadima kurrë nuk u përball me ndjekjen penale pasi kishte kaluar shumë kohë, por gjyqtari që dëgjoi dëshminë e viktimave i përshkroi ato si “të vërteta dhe të besueshme”.
Komentet e Papës në janar nxitën një reagim të zemëruar nga disa prej viktimave. Ata u thanë gazetarëve se kërkesa e Papës për të siguruar dëshmi ishte “ofenduese dhe e papranueshme”
Në fund të udhëtimit të tij në Amerikën Latine, Papa kërkoi falje duke thënë se ai kuptoi se fjalët e tij kishin lënduar shumë. Por ai përsëriti besimin e tij se peshkopi Barros ishte i pafajshëm.
