Kur ka kaluar një ditë nga vrasja e Mario Majollarit, të tjera detaje kanë dalë në dritë.
Sipas burimeve mësohet se në polici janë shoqëruar 15 persona, të cilët kanë qenë dëshmitarë në vendngjarje, por edhe të dyshuar.
Pista kryesore e hetimit është ajo e hakmarrjes për vrasjet e Amarildo Nelajt dhe Ilir Gjuzit në vitin 2000 nga i ati i 28-vjeçarit, Avni Majollari, i cili është dënuar me burgim të përjetshëm.
Ndërkohë që në polici mësohet se janë shoqëruar familjarët e tyre. Vëllai i Ilir Gjuzit, i cili jetonte në Tufinë nuk është gjetur në banesë dhe momentalisht mbi të rëndojnë dyshimet se mund të ketë lidhje me këtë ngjarje. Në vendngjarje janë gjetur dhe 4 gëzhoja, ndërsa policia po punon për zbardhjen e ngjarjes.
Vrasja
Vrasja tronditi mbrëmjen e së martës kryeqytetin, ku 28-vjeçari gjeti vdekjen e menjëhershme me tre plumba pistolete.
Policia dyshon se vrasja ka ardhur për larje hesapesh, pasi i ati i viktimës, Avni Majollari, rezulton një person i dënuar për vrasjen e dy personave në vitin 2000.
Kjo është edhe pista kryesore ku po heton policia. Ndërkohë autorët, ende të paidentifikuar, janë larguar menjëherë pas ngjarjes, e një automjet në drejtim të Dajtit.
Mario Majollari, 28 vjeç, para tre vitesh kishte shkuar në Suedi ku kishte kërkuar strehim pasi ndihej i kërcënuar me jetë. I riu nuk kishte shumë që ishte kthyer, veprim ky që ka rezultuar fatal për të, me autorët që duket se po e monitoronin.
