Detaje nga ngjarja e rende e ndodhur mbreme ne Tirane, ku një 28-vjeçar u ekzekutua në një atentat në zonën e Kinostudios, në Tiranë.
Viktima është Mario Majollari, i cili kishte rreth 5 muaj që ishte kthyer nga Suedia, ku i ishte refuzuar kërkesa për azil. Ngjarja ndodhi rreth orës 20:25, në një rrugicë që lidhet me rrugën “Aleksandër Moisiu”, fare pranë pallatit ku banonte i riu.
Sipas Policisë, viktima ka qenë duke ecur në këmbë, në drejtim të hyrjes së pallatit, kur është qëlluar 4 herë me armë zjarri.
Policia tha se ai ka gjetur vdekjen e menjëhershme, pasi nga këqyrja paraprake në vendin e ngjarjes ka rezultuar se është qëlluar në kokë dhe në trup. Ndërsa atentatorët, duke përfituar nga errësira në rrugicën ku kryen krimin, janë larguar me shpejtësi pa u parë nga banorët e zonës.
Në vendin e ngjarjes është formuar grupi hetimor dhe janë ngritur pistat e para menjëherë sapo është mësuar identiteti i viktimës. Burimet thanë se nga verifikimet paraprake nuk ka rezultuar që Mario Majollari të ketë pasur precedentë të mëparshëm. Policia ka dyshime se 28- vjeçari mund të jetë vrarë për hakmarrje, pasi i ati ndodhet në burg i dyshuar për vrasjen e dy personave.
NGJARJA
Rreth orës 20:25, Policia e Tiranës është lajmëruar përmes një telefonate në sallën operative, për të shtëna me armë zjarri në zonën e Kinostudios. Menjëherë në vendngjarje janë nisur shërbimet më të afërta të Komisariatit nr.4, që kanë konstatuar trupin e pajetë të një të riu.
Brenda pak minutash viktima është identifikuar si Mario Majollari, 28 vjeç, banor në pallatin pranë vendit ku u qëllua për vdekje. Policia tha se në vendin e ngjarjes janë gjetur 4 gëzhoja arme zjarri, që dyshohet të jetë pistoletë tip “TT”.
Burimet thanë se viktima është qëlluar në kokë dhe në trup e për pasojë ka gjetur vdekjen e menjëhershme. Atentatorët kanë shfrytëzuar momentin kur në zonë nuk kishte shumë lëvizje.
Në rrugicën me ndriçim të dobët nuk ka pasur lëvizje në momentin e krimit, kjo edhe për arsye se në atë moment po luheshin ndeshjet e “Champions League” dhe rrugët ishin të boshatisura, pasi banorët ishin nëpër lokale duke parë ndeshjet.
Banorët e zonës u shprehën mbrëmë se kanë dëgjuar vetëm të shtënat dhe nuk kanë parë asgjë. Ndërsa autorët, që ende nuk dihet se sa persona mund të kenë qenë, janë larguar përmes rrugicave të errëta, dyshohet me një automjet.
Nga verifikimet paraprake të disa kamerave sigurie të bizneseve përreth, autorët mendohet të jenë larguar në drejtim të rrugës “Myslym Keta”, për të humbur gjurmët përfundimisht në zonën e Tufinës. Policia ka ngritur pika të shumta kontrolli në disa zona kryesore.
HETIMI
Deri tani, pista kryesore ku janë përqendruar hetimet është ajo e vrasjes për hakmarrje, pasi i ati, Avni Majollari, ndodhet në burg, i dënuar përjetë, për vrasjen e dy personave në vitin 2000. Kjo edhe për arsye se viktima Mario Majollari nuk rezulton person me precedentë të më- parshëm penalë apo të ketë pasur probleme.
Nga deklarimet që u janë marrë disa dëshmitarëve, rezulton se ai kishte vetëm 5 muaj që ishte kthyer, pasi që prej vitit 2015- të kishte qëndruar në Suedi. Ai kishte kërkuar azil me pretendimin se në Shqipëri i rrezikohej jeta, madje duke deklaruar se kishte marrë edhe kërcënime, por kërkesa i ishte refuzuar.
Kjo ishte arsyeja pse ai kishte vendosur të kthehej në Shqipëri. Por nga të dhënat e siguruara në rrugë operative nga Policia, gjatë kësaj periudhe që ndodhej në Tiranë, ai nuk ishte përfshirë në ndonjë konflikt dhe njihej si person i qetë në zonë.
