Lajme jo të mira në shtëpinë e Milanit. Klubi kuqezi ka humbur për sfidën me Napolin dhe jo vetëm, Alessio Romagnoli.
Ashtu siç komunikon vet skuadra, mbrojtësi, i cili u dëmtua në ndeshjen e së dielës kundër Sassuolos, i është nënshtruar vizitave më të detajuara mjekësore të cilat kanë evindetuar edhe shkallën e saktë të dëmtimit të tij.
Romagnoli ka pësuar një dëmtim në bicepsin femoral të kofshës në këmbën e majtë. Lojtari, që tashmë do të duhet të kryeje edhe teste të tjera në 2-3 javët e ardhshme, mund të rikthehet në fushën e lojës më 5 Maj, në ndeshjen kundër Veronas.
Në fakt vizitat mjekësore evidentuan atë që te Milani i trembeshin. Kështu trajneri Rino Gattuso humbet lojtarin për ndeshjen kryesore me Napolin.
Një lajm ky që nuk i duhej kuqezinjve duke ndezur alarmin në repartin e mbrojtjes, pasi dëmtimit të Romagnolit i shtohet edhe mungesa e Bonucci-t për shkak kartonësh. Një zgjedhje e detyruar ajo e teknikut mund të jetë aktivizimi i dyshes Musacchio-Zapata.
Megjithatë problemi për Gattuson nuk qëndron vetëm te mungesa në këtë ndeshje, pasi trajnerit do t’i duhet të bëjë pa shërbimet e Romagnolit për të paktën 1 muaj. Kështu ndeshjes me Napolin i shtohen edhe ato të Torino, Benevento dhe Bologna.
Shpresa mbetet ndeshja me Veronën më 5 Maj, ndërsa pak ditë më pas është edhe superndeshja me Juventusin, e vlefshme për finalen e Kupës së Italisë.
Megjithatë gjithçka do të varet nga mënyra se si do të reagojë mbrojtësi gjatë fazës së riaftësimit.
