Deputetët demokratë do të mbështesin protestën e nesërme të biznesit të vogël, i cili do të ulë qepenat në Tiranë nga ora 11:00 deri në 12:00, duke kundërshtuar kështu përfshirjen në skemën e TVSH-së.
Në mbledhjen e sotme të Grupit Parlamentar demokrat është vendosur që ligjvënës të kësaj partie të jenë të pranishëm në të gjitha vendet ku do të protestohet.
Protesta përfshin bizneset që operojnë tek Tregu Elektrik, Industrial, Medreseja, Ushqimor dhe Çam.
Gjatë mbledhjes së Grupit Parlamentar është diskutuar edhe për mundësinë e zhvillimit të një tjetër proteste në kuadër të mosbindjes qytetare, duke bllokuar akse rrugore, sikundër ndodhi të enjten e javës që lamë pas.
Mësohet se kreu demokrat Lulzim Basha ka kërkuar që opozita të vazhdojë të mbështesë protestat e qytetarëve dhe bëri thirrje për protesta në të gjithë vendin.
