Sulejman Starova mori para pak kohësh drejtimin e skuadrës kosovare Feronikel, duke u bërë trajneri i katër shqiptar që do të drejtojë në këtë ligë futbolli. Në një prononcim për “insporti.com”, “Bobi” tregoi se nuk i kanë munguar asnjëherë njohuritë për futbollin kosovar, madje identifikoi Riza Lushtën si mbretin e futbollit.
“Kam pasur fatin që babai im ka qenë mik me Riza Lushtën, prandaj di edhe për futbollin e Kosovës të asaj kohe. Unë jam 63-vjeç dhe e ndjej obligim ta them këtë. Po ashtu, dua të theksoj se futbolli i Kosovës është identifikuar me Fadil Vokrrin, ai i Shqipërisë me Panajot Panon, por mbreti i futbollit shqiptar në përgjithësi është Riza Lushta”.
Starova gjithashtu foli edhe për situatën aktuale në futbollin Kosovar, duke u shprehur tepër i kënaqur për përparimet që janë bërë vitet e fundit në infrastrukturë.
“Në radhë të parë, dua të them që futbollistët e Kosovës kanë shpirt gare. Këtë e them edhe nga përvoja, sepse unë kam punuar me shumë futbollistë kosovarë. E rëndësishme tjetër është fakti që Kosova po përparon edhe në përgatitjen e infrastrukturës, siç është rasti me Feronikelin, që tani e ka edhe një fushë ndihmëse.
Duhet të jesh magjistar të tregosh ku do të jetë Feronikeli në fund të kampionatit. Ka edhe shumë lojë, ndryshimi ndërmjet skuadrave nuk është i madh, por varet edhe nga ecuria e rivalëve.”
Në fund “Bobi” foli edhe për temën më të nxehtë në Shqipëri, dënimin e Skënderbeut nga UEFA.
“Është dëm i madh për futbollin në përgjithësi. Korça nuk guxon të mbetet pa futboll, sepse është një qytet që e do futbollin, një qytet me njerëz të kulturuar, një qytet me traditë. Prandaj, të gjithë, duhet të bëjmë gjithçka që është e mundur që Korça të ketë futboll përsëri”.
