Një furgon që transportonte emigrantë afganë, pakistanezë dhe iranianë është përplasur me një shtyllë ndriçimi dhe më pas ka marrë flakë duke shkaktuar vdekjen e 17 personave.
Shumë emigrantë që ranë në rrugë nga furgoni i tejmbushur u përplasën më pas nga një tjetër furgon. Si pasojë e aksidentit të tmerrshëm në aksin rrugor Igdir-Kars të Turqisë, pranë kufirit me Armeninë, humbën jetën 17 persona dhe u plagosën 36 të tjerë.
Gazeta turke “Hurriyet” thotë se megjithëse furgoni i mbushur me emigrantë të paligjshëm kishte vetëm 14 ulëse, në të ishin futur mbi 50 të persona.
Shoferi i furgonit me emigrantë humbi jetën në aksident, ndërsa shoferi i furgonit të dytë që përplasi për vdekje disa prej atyre që kishin rënë në rrugë u vu në pranga sëbashku me taksistin që e ndihmoi të largohej nga vendi i ngjarjes.
Emigrantët e paligjshëm, mes të cilëve edhe gra e fëmijë, mësohet se kishin hyrë në Turqi nga Irani dhe do të trafikoheshin për në vendet evropiane.
