Marrëdhënia mes Luke Shaw dhe Jose Mourinhos sa vjen dhe përkeqësohet.
Lojtari është shprehur i pakënaqur nga trajneri portugez pasi e zëvendësoi në minutën e 46 në ndeshjen ndaj Brighton në FA Cup (2-0).
Mbrojtësi i zëmëruar i është afruar teknikut dhe e ka pyetur përse e nxorri jashtë loje.
Siç shkruan tabloidi britanik “Daily Mail”, 22-vjeçari i ka kërkuar llogari Mou-t se përse ky i fundit e veçon padrejtësisht nga të tjerët.
Mirëpo, ish-trajneri i Real Madrid i është përgjigjur se nuk po luante aq mirë në fazën mbrojtëse.
Futbollisti anglez dhe “Special One” janë dëgjuar ndërsa kanë komunikuar në dhomën e zhveshjes me zë të lartë.
Burime pranë klubit kanë treguar se mbrojtësi është shprehur i dëshpëruar ndaj trajnerit i cili nuk i ka kursyer kritikat ndaj tij.
Kriza me Mourinhos duket që do t’a largojë lojtarin nga “Old Trafford”. Përveç kësaj mungesa e aktivizimit ka bërë që ai të mbetet edhe jashtë listës për dy miqësoret që kombëtarja angleze luajti ndaj Holandës dhe Italisë pak ditë më parë.
Mourinho po tregon edhe njëherë se para tij askush nuk duhet të ngrejë zë dhe të kundërshtojë vendimet e tij, ashtu sikurse ndodhi edhe me Paul Pogba-në, të cilit nuk e aktivizoi në disa takime dhe në të tjerë luajti si zëvendësues.
Shaw u transferua në qershor të 2014-ës nga Southampton për 31.5 milionë paund te Manchester United, duke u bërë futbollisti më i ri i shtrenjtë anglez.
Lojtari nuk ka kaluar një aventurë dhe aq të mirë me United për shkak edhe të dëmtimeve që e kanë lënë për disa muaj jashtë fushës së blertë.
Që nga momenti që ka veshur fanellën e “Djajve të kuq” ai ka zhvilluar vetëm 39 ndeshje. E ardhmja e tij duket qartë që do të jetë larg “Old Trafford”.
