Kompanitë call-center vijojnë të mbeten punëdhënëset me më shumë oferta pune, veçanërisht për të rinjtë. Qindra CV janë dorëzuar nga të rinjtë në Panairin e Punës dhe Edukimit.
Përfaqësues të këtij biznesi, thonë se arseja kryesore për kërkesat e larta të punësimit janë pagat.
Dorian Beqiri, administrator call center tha se: “Interesi ka qenë i lartë krahasuar dhe me vitet e tjera. Struktura jonë nga ana tjetër përgjigjet me oferta gjithmonë të reja pune në pozicione të ndryshme. Aktualisht, call-center është një zgjidhje punësimi që ofron më tepër vlerë monetare se sa të gjitha strukturat e tjera. Në kompaninë tonë aktualisht janë të punësuar rreth 300 punonjës, pjesa më e madhe janë të rinj, ku 85% e punonjësve janë me arsim të lartë”.
Ndër profesionet më të kërkuara në tregun e punës janë degët e inxhinierive.
Anisa Hoxha, koordinatore kompanie private u shpreh: “Ka vazhdimisht njerëz që kërkojnë punë në një profil specifik, siç janë pjesa teknike e inxhinierëve, qoftë te inxhinieria e mjedisit dhe teknologjia e informacionit”.
Aplikimet në portalet e punësimit online janë një tjetër mënyrë për gjetjen e punës.
Krisli Miço, përfaqësuese portali punësimi tha se: “Shumica kanë qenë studentë të niveleve bachelor dhe master, por kanë ardhur edhe nga gjimnazet që kërkojnë një punë part-time ose gjatë kohës së verës. Aktualisht numërojmë diku te rreth 400 njoftime pune që janë nga fusha e IT, ekonomisë, financë, marrëdhënie me publikun, komunikim. Numërojmë mbi 5 mijë kompani që janë të regjistruara në duapunë.com dhe rreth 86 mijë punëkërkues të regjistruar që kërkojnë punë vazhdimisht”.
Në panairin e çelur nga data 28-30 mars në Pallatin e Kongresve, sipas të dhënave nga Bashkia e Tiranës janë ofruar rreth 3 mijë vende të lira pune.
