FIFA ka vendosur t’i heqë tre pikë skuadrës së Shkumbinit që është pjesë e Kategorisë së Parë dhe lufton për të siguruar mbijetesën.
Por, një gjë e tillë do të jetë mjaft e vështirë për t’u arritur, pas dënimit që ka marrë.
Lajmin e ka bërë me dije Federata Shqiptare e Futbollit dhe Shkumbini është penalizuar pasi, nuk ka paguar futbollistin Frederico Mazur, i cili ka luajtur tetë ndeshje me peqinasit në vitin 2013-2014.
Njoftimi i plotë i FSHF-së
Federata Shqiptare e Futbollit është njoftuar për vendimin më të fundit të Komisionit të Disiplinës në FIFA për çështjen e klubit Atletico All Boys kundër klubit të futbollit Shkumbini, lidhur me kompensimin për trajnim të lojtarit Federico Mazur.
Për shkak të moszbatimit të vendimit të marrë nga Komisioni i Disiplines i FIFA-s me datë 7 Shtator 2017 nga ana e klubit të futbollit Shkumbini, është implementuar menjëherë nga FSHF, pika 4 e vendimit, duke i zbritur klubit të Shkumbinit 3 (tre) pikë nga klasifikimi aktual në kampionat.
FSHF pasi ka përcjellë vendimin tek klubi i futbollit Shkumbini i bën me dije marrjen e masave të menjëherëshme për shmangien e penaliteteve të mëtejshme, në rast moszbatimi sërish.
