Nga Boldnews.al
Një lëvizje e beftë ka ndodhur në stafin drejtues të Prokurorisë Shqiptare. Ardian Nezha, drejtuesi i Prokurorisë së Elbasanit, ka dhënë dorëheqjen tre muaj pasi mori këtë detyrë,
Nezha është një prej njerëzve më të besuar të Kryeprokurores së Përkohshme, Arta Marku. Shefja e institucioni të akuzës e caktoi Ardian Nezhën në drejtimin e një prej prokurorive më të rëndësishme vetëm dy javë pasi ajo kishte marrë detyrën.
Ende nuk dihen arsyet e kësaj dorëheqje, por “Boldnews.al” mësoi se Nezha e ka argumentuar largimin nga posti drejtues për “shkaqe personale”.
Rreth orës 15.00 të ditës së premte, Nezha ka zhvilluar një takim me drejtuesi e seksioneve të institucionit, ku u ka komunikuar vendimin e tij për largimin nga drejtimi i Prokurorisë së Elbasanit.
Burime nga ky institucion pohuan për “Boldnews.al” se Nezhës i është kërkuar me insistim “dorëheqja” nga Kryeprokurorja e Përkohëshme, Arta Marku.
Kjo lëvizje përbën një prapa-kthehu të rëndësishme nga ana e Prokurores së Përgjithshme. Ajo e solli Ardian Nezhën me bujë nga prokuror i thjeshtë në Pukë, në drejtimin e një prej strukturave më të rëndësishme të hetimit penal në vend, në Elbasan.
Ardian Nezha, një prokuror me përvojë të gjatë pranë Krimeve të Rënda, “u internua” dy vjet më parë si prokuror i thjeshtë në Pukë, me firmë të ish-Prokurorit të Përgjithshëm, Adriatik Llalla.
Prokuroria nuk bëri asnjëherë publike në atë kohë arsyet e këtij largimi. Ndërkohë, as Nezha vetë nuk e kundërshtoi atë transferim nga Tirana drejt qytetit verior.
Menjëherë pas largimit të Llallës, Nezha rikthehet në rol kryesor. Me firmë të Arta Marku, ai vendoset në krye të Prokurorisë së Elbasanit, pozicion që e mbajti deri të premten.
Ndërkohë, pritet që brenda pak ditëve, Kryeprokurorja e Përkohshme të caktojë drejtuesin e ri të Prokurorisë së Elbasanit.
