Thiago Silva këmbënguli se Brazili meriton më shumë respekt, pas fitores ndaj kampionëve të Gjermanisë në Berlin. Brazili fitoi minimalisht, edhe në shenjë hakmarrjeje për disfatën turpëruese 7-1 ndaj Gjermanisë, në Kupën e Botës 2014. Gabriel Jezus e vendosi miqësoren ndërkombëtare në “Olympiastadion”, ndërsa Brazili i dha fund brezit të pamposhtur të Gjermanisë me 22 ndeshje. Kjo ishte një tjetër shtytje për Brazilin, në ndjekjen e kurorës së gjashtë të Kupës së Botës. Qendërmbrojtësi veteran, Thiago Silva, ishte mjaft entuziast pas ndeshjes.
“Me gjithë vlerësimin e duhur ndaj Gjermanisë, por kjo fanellë (Brazili) meriton më shumë respekt. Ne jemi të lumtur që e kemi marrë këtë rezultat ndaj një ekipi të madh, – tha Silva për “TV Globo”. – Ne jemi në rrugë të drejtë, të përulur dhe të disiplinuar, teksa treguam diçka më shumë se Gjermania në këtë miqësore. Kjo do të thotë që stili ynë i futbollit po zgjerohet gjithnjë e më shumë, siç kemi menduar që nga fillimi. Pavarësisht nga të gjitha vështirësitë, edhe pse kishim katër muaj pa luajtur një ndeshje së bashku, paraqitja jonë ishte i shkëlqyeshme. Mendoj se po kalojmë një moment të jashtëzakonshëm”.
Ylli i Manchester City, që shënoi golin, Jesus, shtoi: “Jam i lumtur jo vetëm sepse shënova golin, por edhe me angazhimin tim, dëshirën për të fituar, për të qenë një futbollist, që i pëlqen ta ndihmojë ekipin”.
Ndërkohë, Paulinho shtoi: “Brazili po jeton një moment pozitiv dhe nuk ka të bëjë fare me atë që ndodhi në Botërorin 2014. Dimë si të vuajmë dhe të mbrojmë, por mbi të gjitha kemi dhënë një provë të madhe në përgatitjet për Kupën e Botës duke mundur një kundërshtar të nivelit të lartë”.
