Erkand Qerimaj është tërhequr nga gara e tij përkatëse në Kampionatin Europian të Peshëngritjes, që po zhvillohet në Rumani. Peshëngritësi shqiptar, që rrëmbeu vendin e tretë në Botërorin e SHBA-së, pak muaj më parë, është tërhequr për shkak të një inflamacioni në gju, që i ka shkaktuar dhimbje të mëdha. “Telesport” kontaktoi me peshëngritësin, i cili konfirmoi tërheqjen nga gara, pas një konsulte që ka zhvilluar me trajnerin dhe mjekët.
Erkand Qerimaj ishte pretendent për të mbrojtur titullin kampion në këtë kampionat, por ka rezultuar i pafat. Shkodrani do të garonte për peshën 77 kg. Ndërkohë, peshëngritësi tjetër shqiptar, Romario Avdiraj, e la garën në mes për shkak të një dëmtimi që pësoi në këmbë. Zyrtarët e federatës thonë se Avdiraj do t’i nënshtrohet një kontrolli të specializuar mjekësor në Rumani, për të mësuar më shumë rreth dëmtimit në gjurin e djathtë.
Në stilin e shkëputjes, Avdiraj dha vetëm një rezultat, duke ngritur me sukses 110 kg në përpjekjen e parë, ndërsa në dy provat e tjera dështoi të ngrejë 115 kg, duke u renditur i teti në këtë stil, i fundit. Në stilin e shtytjes, Avdiraj nuk konkurroi fare, duke mos dhënë kështu një rezultat as në dygarësh. Sot, për Shqipërinë do të konkurrojnë peshëngritësit Briken Calja dhe Arbër Çerçizi, të dy në peshën 69 kg, ndërkohë që në ditët në vijim, në pedanë do të ngjiten edhe Daniel Godelli, në peshën 77 kg (ditën e enjte) dhe Krenar Shoraj, në peshën 85 kg (ditën e premte). Shqipëria pretendon medalje me disa nga shtangistët e saj në këtë Europian.
