Kjo merkato vere pritet të jetë e nxehtë jo vetëm me lëvizjet e lojtarëve, por sidomos në stolat e klubeve.
Më të përfolurit deri tani janë ato të Paris Saint-Germain, Chelsea, Arsenal apo dhe Bayern Munich.
Te klubi bavarez kanë nisur prej kohësh të mendojnë për pasuesin e Jupp Heynckes, i cili do të largohet nga drejtimi i skuadrës në fund të sezonit.
Të shumtë janë alternativat për pasuesin e teknikut 72-vjeçar, përfshirë këtu Mauricio Pocchetino të Tottenham, ish-trajnerin e Borussia Dortmund, Thomas Tuchel apo dhe trajnerin aktual të Kombëtares Gjermane, Joachim Loew.
Gjithsesi është ky i fundit që e përjashton veten nga drejtimi i gjigantit gjerman. Në një intervistë të dhënë për ZDF, pak patra ndeshjes miqësore me Brazilin, 58-vjeçari pranoi se objektivi i tij nuk është marrja e drejtimit të Bayern.
“Bayern Munich? Kam të tjera mendime në mendjen time këto kohë se sa bavarezët. Jam i përqëndruar të mbroj titullin e Botërorit me Gjermaninë në Rusi, këtë verë.”
Gjithsesi sipas një artikulli të Kicker, drejtuesit e klubit bavarez nuk e kanë marrë asnjëherë në konsideratë emrin e Loew, i cili më së shumti është lidhur me stolin e Arsenalit.
Megjithatë Loew dhe Tuchel janë më të favorizuar se alternativat e tjera, kjo pasi të dy trajnerët janë gjermanë, diçka që të Bayern e vlerësojnë shumë si fakt.
Për këtë çështje ka folur gjithashtu edhe ish-drejtori teknik i Bayern Munich, dhe aktualisht në këtë post te skuadra e Stuttgart, Michael Reschke, cili në një prononcim për “Sky Sport News”u shpreh:
“Ata kanë një plan të pastër dhe të qartë. Jam plotësisht i bindur për këtë gjë. E di shumë mirë situatën te Bayern Munich. I njoh njerëzit e përfshirë në këtë çështje, veçanërisht Karl-Heinz Rummenigge dhe Uli Hoeness. Jam shumë i bindur që ata janë larg me këtë situatë, më shumë se sa të gjithë njerëzit mendojnë.”
