Australia i është bashkuar vendeve që kanë dëbuar diplomatë rusë, si përgjigje ndaj helmimit të ish-spiunit rus në Britaninë e Madhe. Kryeministri Malcolm Turnbull tha dy diplomatë që besohet se janë agjentë të pashpallur të inteligjencës do të dëbohen.
“Së bashku me Mbretërinë e Bashkuar dhe aleatë dhe partnerë të tjerë, Australia po ndërmerr veprime si përgjigje ndaj sulmit të fundit me agjent nervor” njoftoi kryeministri australian Malcolm Turnbull në një deklaratë të martën.
Turnbull tha se sulmi makabër në Salisbëri ishte një sulm ndaj të gjitha vendeve.
Më shumë se 100 diplomatë rusë u dëbuan nga mbi 20 vende si pjesë e reagimit të koordinuar nga SHBA dhe BE të hënën. Rusia u zotua se do t’i kundërpërgjigjej këtij gjesti provokativ.
Nga ana e saj Moska mohon çdo përgjegjësi në sulmin ndaj ish-agjentit Sergei Skripal dhe vajzës së tij.
