Në dy javë, 32 anëtarët e Këshillit Bashkiak të LSI-së në të gjithë vendin, janë “penduar” për zgjedhjen e tyre politike dhe tashmë i janë bashkangjitur PS-së. Me deklarata të gatshme të dala nga zyrat e PS-së lokale, grupe-grupe të zgjedhurit e LSI-së, kanë kaluar me forcën e vetme në pushtet. Përtej dobësimit të LSI-së, është një taktikë e njohur e PS-së e cila fillimisht synon që të bëhet shumicë në këshillat bashkiak, duke kaluar çdo projekt që dëshiron për të pasur të sigurta votat e nevojshme.
Përveç kalkulimeve lokale, strategjia e PS-së është e qartë, duke dobësuar forcën politike që qeverisi për katër vite dhe përdorur “dezertorët e mirëpritur”, që tu bashkohen makinerisë së madhe elektorale në zgjedhjet që do të vijnë. Një bashkim PD-LSI dhe dalja në një sigël të përbashkët në zgjedhjet lokale, me një aritmetikë të thjesht do i ndryshonte balancat dhe rreziku që PS të humbë disa bashki është i madh. Por çudia vjen pikërisht nga “motivet” që LSI-stat e penduar japin.
“Largohemi menjëherë nga kjo forcë politike dhe i bashkëngjitemi grupit të këshilltarëve të PS. Nuk mund të rrimë në një forcë politike bashkë me PD-në. Të rrish krah PD-së, do të thotë të pranosh politikën antishqiptare”-deklaronin të ikurit, që detyroheshin të lexonin deklarata e gatshme të gatuara në zyrat e PS-së. Motive që japin është edhe më qesharak, ku pretendojnë se pasi PD po hetohet për finacim nga lobet ruse, kjo nuk mund të “durohej” prej tyre…
Lali Eri, “blerësi” i parë
Shenjat e para se pas zgjedhjeve të përgjithshme do të ndryshonte raporti edhe në pushtetin lokal i dhanë anëtarët e LSI-së në Këshillin Bashkiak të Tiranës. Pikërisht në momentin që Erion Veliajt (Lali Erit) i nevojiteshin votat për të miratuar rritjen e çmimit të ujit të pijshëm, apo për të kaluar projektet e tjera të bashkisë, siç ishte dhënia e ndërtimit të shkollave me konçension, arriti të “blinte” lirë në tregun politik anëtarët e LSI-së. Kaq i mjaftonte për të bërë balancat e votave të nevojshme në këshillin bashkiak.
Kjo praktikë nisi të marrë formë edhe në bashkitë e tjera të vendit, ndërsa duket se sajuan një shkak, pa shkak, për të kapërcyer “ylberin” dhe nga LSI-stë të thekur, të kthehen në anëtarë të PS-së. Një pjesë e anëtarëve të këshillave bashkiak që kanë marrë këtë nismë dhe aktualisht nuk janë pak, por 32 në të gjithë vendin, po mendojnë për të ardhmen personale. Është një strategji e mirëmenduar dhe pritej vetëm një shkëndijë që një pjesë e përfaqësuesve të LSI-së ti bashkoheshin forcës së pushtetit.
Në fillim u gjet shkak se ishin kundër “politikës me çizme”, duke ironizuar gjestin e kryetares së LSI-së Monika Kryemadhi që në sallën e parlamentit tentoi të godasë me çizme kryeministrin Edi Rama. Më vonë u shpik dyshimi se PD kishte paguar disa lobues rus, që këta të fundit të ndikonin në SHBA për të mbështetur Lulzim Bashën. Teori konpirative të denja për skenarë filmash.
Rama ndan “tepsinë” me të ikurit
Në fushatën elektorale të zgjedhjeve të 25 qershorit kryeministri Edi Rama nuk shpalosi asnjë program qeverisë. Moto e tij ishte “më lini të vetëm timonin që t’ju qeveris më mirë”. Arriti të siguronte pushtetin duke kapërcyer në 74 mandate të fituara në zgjedhje të dyshimta, të cilat u shvilluan pak muaj pas kanabizimit të madh të vendit në vitin 2016. Tashmë Rama e ka “harruar” premtimin për të qeverisur i vetëm dhe në shërbim të qytetarëve, pasi po ndan copëza të “tepsisë së pushtetit” me të larguarit e LSI-së.
Zërat qarkullojnë se gjithkush që është larguar dhe do të largohet nga LSI-ja, e ka të sigurtë një vend si anëtar i ri i Këshillit Bashkiak të PS-së, ose në rastin tjetër, një vend pune në administratën e lartë shtetërore. Po pikëtohen personazhe me influencë në zonat ku jetojnë dhe në fund të llogarive ata vlejnë, pasi në disa qarqe me një grusht votash ndahet një mandate kryebashkiaku apo deputeti.
