Liverpool do të duhet të shkelë parimet për ta bindur futbollistin e përfaqësueses së Gjermanisë, Emre Can, të nënshkruaj një kontratë të re.
Manchester City dhe Juventus janë dy klubet që i janë vënë pas mesfushorit dhe për këtë të kuqve u duhet që të paguajë mbi 200 mijë sterlina në javë për ta bindur të nënshkruajë kontratën e re.
Por te Liverpooli në këtë mënyrë do të prishnin hierarkinë e pagave dhe kjo nuk do të ishte diçka e mirë edhe për grupin. Emre e Can ka në dorë edhe arrën edhe gurin, pasi në verë del lojtar i lirë dhe shumë klube do të kërkojnë ta bindin pikërisht me pagën e lartë.
Sigurisht ai kërkon të luajë në një klub të madh dhe Guardiola dëshiron të ketë nën urdhrat e tij sërish, këtë herë te Manchester City. Ata kanë punuar së bashku te Bayern Munchen për pak kohë, pasi më pas mesfushori kaloi te Leverkusen për të pasur më shumë hapësira.
Emre Can prej katër sezonesh luan në nivele të larta te Liverpool-i dhe është vetëm 24-vjeç.
Një paraqitje e mirë në “Rusi 2018” do bënte shumë klube ta mbulonin në “ar” mesfushorin, që as vetë nuk e di për momentin se ku do të luajë në të ardhmen.
Pak kohë më parë ai ka folur për Suddeutsche Zeitung:
“Unë kam vetëbesim dhe them se cilësitë e mia janë të mjaftueshme për të luajtur në një klub të madh sezonin e ardhshëm. Po bëj mirë në Angli për momentin. Kampionati spanjoll është gjithashtu tërheqës. E njëjta gjë vlen edhe për Gjermaninë, ku fokusi është te taktika, sikurse në futbollin italian. Rastësisht, kjo vlen edhe për Francën. Kjo Ligë tani është ndër më të mirat në Europë. Prandaj unë nuk dua të përjashtoj asgjë, sepse nuk e di se çfarë do të bëj deri në verë” – ka thënë talenti gjerman.
