Albert Zekaj ishte 32-vjeçari, i cili masakroi shokun e dhomës dhe trupin e tij e hodhi në kanal. Një histori tronditëse e ndodhur pothuajse një vit më parë, por që u zbulua vetëm pak javë më parë.
Misionarë të një shoqate fetare në Tiranë, të cilët kanë strehuar dhe punësuar në ambientet që administrojnë Albert Zekajn janë tronditur kur kanë mësuar se 32-vjeçari ishte autori i vrasjes makrabre të Kreshnik Beqirajt.
Ata kanë udhëtuar drejt Fierit dhe kanë dhënë deklarime në Prokurori në mënyrë vullnetare, kur edhe do të jepej masa e sigurisë për Zekajn.
Nga sa mësohet, misionarët e shoqatës fetare janë shprehur se nuk kishin kuptuar asgjë të dyshimtë tek Alberti. Ata janë shprehur të tronditur, ndërsa kanë bërë të ditur se 32-vjeçari erdhi si nevojtar.
“Kur dëgjuam se Alberti mund të kishte vrarë një njeri, na tronditi. 32-vjeçari erdhi tek shoqata jonë në muajin gusht të vitit të kaluar dhe kërkoi ndihmë dhe ne i kemi mundësuar strehim, ushqim dhe veshje sa herë që ka pasur nevojë. Madje i kemi siguruar edhe punë me kohë të pjesshme. Dukej i qetë, i dëgjuar, ishte fjalëpak, por kurrë nuk kemi pasur ndonjë dyshim se ai mund të ishte një vrasës”.
Duke vijuar më tej, misionarët përpara hetuesve kanë deklaruar se ai u kishte thënë se kishe pak komunikim me familjen e tij. “Jemi vërtetë të tronditur që kemi ndihmuar një person të tillë! ”.
Kreshnik Beqiraj, 36-vjeçari nga Fieri u zhduk mbrëmjen e 22 Qershorit të vitit të kaluar
Viktima dhe autori, shokë me njëri-tjetrin
Kreshnik Beqiraj nga Fieri dhe Albert Zekaj nga Malësia e Madhe ishin njohur në Belgjikë përpara tre viteve. Ata kishin marrë një shtëpi me qera në Fieri, ku edhe jetonin.
Mirëpo, për rrethana që ende nuk janë sqaruar 32-vjeçari natën e 22 qershorit e ka masakruar shokun e tij me çekiç dhe më pas trupin e ka mbështjellë me batanije, duke e hedhur në një kanal, në fshatin Daullas të Fierit.
Trupi i pajetë u gjet rastësisht nga banorët e zonës dhe sot u bë e mundur zbardhja e vrasjes, identifikimit të viktimës dhe vendosjen në pranga të autorit, i cili e ka pranuar krimin e rëndë.
Mësohet se para grupit hetimor, Zekaj ka thënë: “Isha i dehur kur e vrava Kreshnikun, kur e kuptova që kishte vdekur, e groposa”.
Viktima ishte denoncuar në policinë e Fierit, kur edhe kishin nisur hetimet.
“Ky shtetas ka qenë shok me viktimën K.B., ku janë njohur para tre vjetësh në Belgjikë dhe më pas kanë qëndruar në shtëpi me qera në qytetin e Fierit.
Më datë 22.06.2017 rreth orës 23:00 ky shtetas dyshohet se e ka vrarë ne sende te forta dhe trupin e ka hedhur në afërsi të fshatit Daullas.
Pas marrjes në pyetje ai pranoi autorësinë e vrasjes dhe hedhjen e kufomës në vendin ku u gjet.
Viktima ishte denoncuar në polici i humbur nga familjarët, por nga veprimet e kryera si dhe nga dyshimet e familjarëve, në muajin Janar 2018 Drejtoria Vendore e Policisë Fier ka nisur hetimet pasi dyshohej se ky shtetas mund të ishte vrarë ose rrëmbyer.
