Real Madrid është duke shpresuar se një ofertë prej 150 milionë eurosh, plus Lucas Vazquez, do të jetë e mjaftueshme për ta marrë sulmueisn egjiptian, Mohamed Salah, raporton “Diario Gol”.
Gjigantët spanjollë duan të nënshkruajnë me yllin e Liverpool këtë verë, por mediat iberike deklarojnë se ata nuk janë të gatshëm të paguajnë më shumë se 190 milionë euro për 25-vjeçarin.
“Los Blancos” shpresojnë se mund ta ulin çmimin edhe më shumë, duke përfshirë 26-vjeçarin e Spanjës në ofertën e tyre. Në 41 ndeshjet, që ai ka luajtur këtë sezon, duke numëruar edhe garat e brendshme, edhe Ligën e Kampionëve, egjiptiani ka realizuar 36 gola, ka dhënë 12 asiste. Ai shënon gol mesatarisht për çdo 90 minuta që luan. Shifra të frikshme për një sulmues.
Në fakt, Salah po lufton me Leo Messin dhe Cristiano Ronaldon, ndër të tjera, për “Këpucën e Artë”. Dhe sigurisht, me këto shifra, Florentino ka parë te Salah galaktikun e tij të ri. Një lojtar, i cili, megjithëse jo ende në nivelin mediatik të Harry Kane, ose Neymar, nga sekretariati teknik i të bardhëve shihet si një yll i mundshëm.
