Shtyhet deri në datën 16 prill 2018 aplikimet për gjyqtar në Gjykatën e të Drejtave të Njeriut, në Strasburg. Qeveria inkurajon të gjithë juristët që përmbushin kriteret e mëposhtme, të aplikojnë. Tre kandidatët që do të përzgjidhen do t’i dërgohen Asamblesë Parlamentare të KiE, e cila mund të përzgjedhë njërin prej tyre, ose t’i refuzojë ato, ashtu sikundër ka ndodhur tre herë rradhazi gjatë dy viteve të fundit me emrat që ka paraqitur Shqipëria.
Pas vlerësimit të dosjeve të aplikimit dhe përfundimit të procesit të rivlerësimit kalimtar, aplikantët do t’i nënshtrohen intervistës, ku një pjesë e pyetjeve do të jenë në një nga gjuhët zyrtare të Këshillit të Evropës (anglisht ose frëngjisht).
Mandati i gjyqtarit është për një afat prej 9 (nëntë) vjetësh dhe mbaron pas përfundimit të këtij afati ose kur ai/ajo arrin moshën 70 vjeç. Kandidatët, nëse zgjidhen, duhet të jenë në gjendje të mbajnë këtë detyrë për të paktën sa gjysmën e mandatit 9-vjeçar, para se të arrijnë moshën 70 vjeç.
Ja çfarë paralajmëroi Boldnews.al një ditë më parë
Boldnews paralajmëroi i pari shtyrjen e afatit të aplikimit për pozicionin e gjyqtarit në Gjykatën Europiane për të Drejtat e Njeriut. Të martën përfundon afati i aplikimit për pozicionin e gjyqtarit në Gjykatën Europiane për të Drejtat e Njeriut, por numri i kandidatëve është shumë i ulët.
“Boldnews.al” mësoi se ata pak kandidatë që kanë aplikuar janë lidhje të Partisë Socialiste në pushtet. Ndërkohë, një numër i lartë gjyqtarësh e juristësh me përvojë nuk i janë bashkuar kësaj gare, pasi dyshojnë në mënyrën e përzgjedhjes nga ana e komisionit të ngritur nga Sekretari i Përgjithshëm i Kryeministrisë. Gara për një vend vakant për Shqipërinë në Gjykatën e Strasburgut po realizohet për herë të tre brenda pak muajsh, pasi në dy rastet e mëparshme kandidatët janë rrëzuar nga Komisioni i asaj gjykate.
Gjykata e Strasburgut nuk ka dhënë shpjegime publike se përse nuk i ka pranuar kandidatët e mëparshëm nga Shqipëria për vendin vakant. Por, dyshimet janë që kandidaturat e përcjella nga qeveria shqiptare kanë qenë njerëz që rezultojnë me lidhje të forta me Partinë Socialiste. Ndër kandidatët e rrëzuar më parë nga Gjykata e Strasburgut spikat emri i ish-Prokurores së Përgjithshme, Ina Rama.
Gjatë mandatit të saj në krye të akuzës shqiptare, ajo dëshmoi qëndrime në favor të Partisë Socialiste, në atë kohë në opozitë. Një tjetër kandidat i rrëzuar nga Gjykata e Strasburgut ishte Gent Ibrahimi, kunat i një prej eksponentëve kryesorë të Partisë Socialiste, Mimi Kodhelit.
Kandidatura e tretë e rrëzuar më parë nga Gjykata e Strasburgut ishte Sokol Berberi, lidhje e afërt familjare me Ministrin e Brendshëm, Fatmir Xhafaj. Këto lidhje duket se kanë qenë arsyeja që Gjykata e Strasburgut refuzoi më parë kandidatët e qeverisë shqiptare për të plotësuar vendin vakant në atë institucion të rëndësishëm ndërkombëtar. Nisur nga ky precedent, juristët me përvojë shqiptarë dyshojnë se qeveria do të zgjedhë sërish kandidaturat e paracaktuara prej tyre, ndaj nuk i janë afruar kandidimit.
Nga ana tjetër, kandidatët për gjyqtar në Strasburg duhet të kalojnë procesin e Vetingut me përparësi. Për shumë ekspertë të ligjit dhe trupës së gjyqtarëve, Komisioni i Vetingut është nën kontrollin qeveritar. Për këtë shkak, ata dyshojnë se, me një garë të paracaktuar, qeveria mund t’i “djegë” kandidatët potencialë nëpërmjet levave të saj në Komisionin e Pavarur të Kualifikimit (Vetingut). Njoftimi për aplikimin për vendin vakant të anëtarit të Gjykatës së Strasburgut është publikuar para pak javësh në faqen zyrtare të institucioneve të drejtësisë.
